CLICK HERE FOR THOUSANDS OF FREE BLOGGER TEMPLATES »

الاثنين، 29 سبتمبر 2008

العمرة .. وملاحظاتها

اول شي وقبل كل شي .. عيدكم مبارك وتقبل الله طاعتكم وعساكم من عواده ..
ولاتنسون توزعون عيادي .. واللي يبي يدزلي فانا للحين استقبل
==============
وانا رايح العمره .. عطيت اغراضي حق مندوب الوالد وقلت له ودهم المطار وقص لي البوردنج .. وانا اطلع من الدوام وايي المطار على طول .. شد حيله المندوب وراح وايد مبجر وخذالي اول كرسي بالطياره .. طبعا اخوي وابوي كانوا سابقيني بيومين يعني انا رايح بروحي ، المهم .. ركبت الطياره ولا اشوف اللي يمي ولا واحد اجنبي .. قعدت شوي قاعد اقرا قرآن .. وبعدها رحت لبست احرامي وصليت .. رديت ولا اشوفه جنه مختبص .. وبيده كباية ماي .. اول ماقعدت جان يحطه على الطاوله ..
جان ابدي معاه حوار .. وطبيعي الاسئلة اللي اول شي من وين ووين تعيش وشنو تشتغل .. طلع الريال بريطاني مدير محلات دبنهامز الخليج .. ويحوس بين هالمناطق والحين مستقر بالكويت ..
جان اقوله شلون لقيت رمضان بالكويت .. قالي حلو واسهل من رمضان بالسعودية .. قلت له يعني مالقيت صعوبه وانت تنحرم من واحد من اهم حقوقك طول النهار ..
جان يقولي مثل ماان لي حق اني أكل بالنهار هم لازم احترمكم انكم صايمين وماتقدرون تاكلون .. عشان جذي انا لازم ماآكل .. قلت له بس هذا حقك ومحد يقدر يمنعك .. واذا انت تبي تسويه من نفسك على راحتك .. بس ان يكون قانون ويمنع فهذا شي صعب .. قالي هو اكيد شي من نفسي .. يعني مثلا انا الحين بالطياره واقدر اكل والقانون ماراح يمنعني .. بس احترام لك ماراح آكل .. حتى شرب الماي ماراح اشرب جدامك احترام لك .. قلت له ترى انا عندي عادي .. وانا لازم احترم دينك مثل ماانت محترم ديني .. يعني اذا تبي تشرب ماي او تاكل فماكو اي مشكله ..
بصراحة وايد احترمته ووايد كبر بعيني .. يمكن تشوفون الموقف عادي .. بس انا حسيت ان هالاشخاص اللي جذي تفكيرهم يستحقون ان يكونون الامه المنتصره .. ياريت اللي عندنا يحسون ويصيرون جذي ..

=============
في رحلتنا مع مركز الرواد الى فرنسا ، كان مرافقنا (بالنسبة لي ) أعظم شخصية قابلتها في حياتي .. هو من اصل سوري وعنده جنسية فرنسية وتركية وجواز سفر دبلوماسي اماراتي .. عنده 3 شهادات دكتوراه و2براءة اختراع .. وهو نائب مدير ثامي اكبر شركة اتصالات في اوربا .. فعلا هو انسان نادر ..
زارنا في الكويت في رمضان الماضي فسألته : ماهو تعليقك على السماح ببيع الاكل في الفنادق في شهر رمضان ..
فقال : تخيل انك قررت ان تصيف في احد الدول الاوربية وعند وصولك قالوا لك ان لديهم شهر كامل ممنوع الاكل فيه طوال النهار وذلك بسبب دينهم ... فماذا سيكون ردك .. بالتاكيد ستقول دينهم ولايستطيعون اجباري .. فاذا يجب ان يكون فعلك في بلدك مثل ماتود ان يكون فعلهم في بلدهم ..
=============
وبدامنا تكلمنا عن الدول العربية والتخلف .. وتقدم الغرب ..
وانا بالسعي بالعمره شفت مناظر خلتني اقول صج هالامة ماتستحق ان تتقدم .. جدامي وحده قاعد يدزونها بعربانة وقاعد تشرب ماي .. خلصت منه .. جان تقطه بحركة غريبه جدا .. جنها بالسيارة وخلصت من قوطي بيبسي وتقطه بالشارع .. اي اعظم مكان مقدس عندنا مو محترمينه .. شلون تبون الله يوفقنا ..
ولا الناس اللي قاعد تتوضا بالمطارات اللي على طرف المسعى والماي متكتكت .. يعني في اماكن لازم تمشي وترف احرامك عشان مايحوشه من الماي اللي على الارض ..
هذا طبعا غير الناس اللي تنام باي مكان وباي وضعية ..
=============

أكيد سامعين عن ابراج البيت اللي بمكة واللي برج زمزم وبرج هاجر منهم .. واللي مبينين بالصورة .. البرج اللي بالنص اللي فيه هلال هذا راح يكون فندق فيرمونت الى الطابق 35 .. ومن 35 الى 52 راح يكون حق شركة اعمار .. توهم بدوا يسوقونه .. بس في شي غريب بالتسويق .. نروح تسأله عن السعر يقولك ماندري .. بس انت قولنا تبي الشقه فيها جم غرفه وادفع لنا عربون .. وبعد 6 اشهر نقولك جم السعر .. واذا مااعجبك نردلك فلوسك .. يعني باختصار ماخذين لهم قرض حسن لمدة 6 اشهر ..
تقوله ليش قاعد تسوون جذي يقولك عشان نرفع من الجاديين ونعرف كل واحد يبي جم غرفة عشان نقسم على طلبكم ..
=============
حكمة الاسبوع :
يقال : فضلات البعض ثروة للبعض الاخر .. هنيئا لهم بأخطائي .. ثروتهم الوحيدة ..

السبت، 20 سبتمبر 2008

وليال عشر

ياجماعة اللي قاعد يسويه هالانسان شي مو عادي .. فعلا برنامجه راقي ومعبر .. هذي وحده من افضل حلاقته هالسنه .. 


هذا الجزء الاول

هذا الجزء الثاني

لمشاهدة جميع الحلقات قوموا بزيارة الصفحة التالية ..

ياجماعة تجذي ممكن نقدم الاسلام بصورة حضارية رائعة ..
الله يحفظك يااستاذ احمد ويوفقك ..

=================
بدأت العشر الاواخر من رمضان وبدات معها ايام العتق والنجاة من النار .. نسأل الله يعتقنا في هذه الايام ..
كلها ١٠ ايام استغلوها خير استغلال لتنالوا اكبر قدر ممكن من الحسنات .. ولاتنسوا صلاة القيام لعلكم توفقون لقيام ليلة القدر فقد قال صلى الله عليه وسلم ( من قام ليلة القدر ايمانا واحتسابا غفر له ماتقدم من ذنبه )

================
انا ان شاء الله يوم الاثنين رايح العمره .. عسى الله يسهلها علينا .. وعساه يتقبلها منا ..
توصون بشي غير الدعاء ..

موفقين .. ولاتنسونا من دعواتكم عند الفطور .. فللصائم عند فطره دعوة لاترد ..

وكل عام وانتم الى الله اقرب ..

الأحد، 14 سبتمبر 2008

سوالف وشخابيط

قبل 5 سنين كنت رايح الحج مع الاهل .. والحمدلله كانت حجه وايد سهله وطبيعي كل حجة تمر فيها فترات صعبه شوي .. المهم من قبل ماأسافر وانا حدي فيني انفلونزا وموقادر اقوم ..واحنا هناك وتحديدا بمنطقة مزدلفة سيارتنا كانت واقفه يم سيارة البعثة الطبيه الاردنية .. ( الوالده صيدلانية واختي طبيبه ) .. قامت الوالده وقالت حق الدكتور اللي بالبعثه الاردنية ولدي فيه انفلونزا ابي قطره حق الخشم وقالت له اسمها .. قالها والله ماعندي من هالنوع بس عندي قطرة حق الاذن تمشي حق الخشم .. طبعا انا اللي صار فين جذي !@#$%^&*
الوالده تقولي عادي يصير .. يمكن الدكاتره والصيادله ابخص بالموضوع .. بس هو قالي جذي قلت ماراح آخذها وان شاء الله بالدعاء اطيب .. طبعا كان هو ممكن يقول اي عندي ويعطيني بدون لايقول هالمقدمه ويخبصني .. :)
هذا بالكويتي نسميه .. مايعرف يسولف ..
=================
الشخص اذا كنت محترمه وتتعامل معاه بكل أدب وأحترام وتقدير .. وتسوي له كل اللي تقدر عليه وزياده .. وكل هذا لانك تحبه .. بعدين تلقى على ابسط شي مايرد لك اقل من حقك.. وهو شي بسيط .. هذا شلون تتعامل معاه !!
يعني هل اذا كنت طيب زياده عن اللزوم انت تساعد الناس انهم يدوسون عليك ، خلها على الله ..
=================
ليش كل الشباب الكويتين يبون يصيرون تجار .. وليش كلهم فاهمين بالبورصه .. والحين الهبه اليديد ه .. ليش اغلبهم صارو فاهمين بالعقار .. وكلهم يبون يصيرون تجار عقار ..
شغله ثانية .. الواحد إذا فكر ان بيفتح له بزنس خاص فيه بالكويت .. ليش مايطلع في باله شي غير مطعم ولا كوفي شوب .. لهالدرجة الشعب يحب الاكل والبلعه !!
=================
ليش برمضان وعالفطور ننغث بسرعه .. مع ان بالايام العادية ناكل اكثر من هالاكل .. بس مايصير فينا نفس الشعور .. لاتقولون لانك صايم وتهجم عالاكل بسرعه .. لان حتى اذا صمت بيوم مو من ايام رمضان مايصير فيك نفس الشي .. شنو السر ياترى ..
=================
هالايام صارت مشاهدة مباريات برشلونة سبب رئيسي لامراض القلب والسرطان .. الله ياخذهم صايرين حدهم ينرفزون وماينبلعون ..
الشغلة الثانية .. امس بصراحة متعوني ليفربول بمباراتهم جدام مانشستر .. كان لعبهم حده حلو ..
جماعة الانتر .. امس قول كواريزما حده حلو .. صج صج الله يهنيكم بهاللاعب ..
=================
في كوفي شوب قعدته حدها حلوة صاير بمارينا ويفز اسمها ذي ليفنج روم .. صاير مكانها تحت ماكي .. قعدتها وايد حلوه .. وخصوصا حق الايام اللي يكون الجو فيها حلو .. بس مشكلتها ان المنيو مالها وايد عادي ..
جربوه .. لان قعدته تستحق التجربة ..
================
ختاما .. انصحكم بمشاهدة برنامج خواطر 4 على قناة mbc يحطونه قبل اذان المغرب بمكة مباشرة .. ويعيدونه على قناة الرساله 7:15 .. فعلا برنامج رائع ويستحق المتابعة

الجمعة، 12 سبتمبر 2008

العين الثالثة

انا كلش مو من هواة التصوير ولا من النوع اللي يتذوق الصور ابدا ..
بس الله رزقني باخو يعشق التصوير من صغره الى ان اصبح الان واحد من الناس اللي يقدمون دروس ودورات بالتصوير .. وبمااني انا اخوه الصغير فكانت بعض التجارب تبدي فيني وبعدين يجربها على الشغلات الثانية ..
وبما ان هو الحين قاعد يدرس بامريكا .. وانا صج اشتقت له .. قلت خلني اتذكره بمجموعه من صوره .. 
هذي صورة صورها وعلى قولته كلفتني كشته بمحاضرت يوم كامل .. صج صج حلوه .. وايد قالوا له نبي نشتريها منك بس هو مارضى ..


هذولي اليهال اتراك ومايصيرون لنا .. بس هالصوره هو وايد يحبها .. ليش لاتسالوني لاني ماتذوق الصور :) 

هذي الصوره انا وايد احبها .. وهو قبل لايسافر طبعها بحجم كبير وعطاني اياها :)

هذي صورة صورها بالمركز العلمي ..

هذي هو حده يحبها .. يقولي فيها نظرة فنية .. كيفه هو عاجبته :) 


مشاهدة ممتعة 

وقبل لااخلص .. هو وايد يحب هالمقطع .. 


الاثنين، 8 سبتمبر 2008

لذة النجاح

اللي صار اليوم وأمس بالبورصة مو معقول .. يعني هذا اقل ماأسميه لعب .. أو على قولة أخوي يقولي السوق تقندر .. شنو يعني بآخر دقيقة يرتفع المؤشر 60 نقطة اليوم .. ولا طيحة أمس مو معقول يكون سببها اشاعة أستقالة محافظ البنك ..
باختصار .. سوق مسخرة ..

===================
النجاح شي جميل جدا وممتع جدا .. وله لذة لايمكن ان توصف .. والانسان بطبعة يحب ان يعيش لذة النجاح هذه ويفتخر بنجاحاته التي حققها .. وهذا الشيء يدفع الى الاستعجال في محاولة قطف الثمرة مما يؤدي إلى انهيار عملك بالكامل ..
من القواعد التي تعلمتها في الحياة ( ان ليس من الضروري ان ترى ثمرة نجاحك وانت حي ) وهذا شيء يدعونا الى ان نصبر ولانستعجل قطف الثمرة قبل اوانها ..
ولنا في ذلك امثلة :
1- وخير من نبدأ به امثلتنا هو الرسول صلى الله عليه وسلم حيث بشر وهو الصادق المصدوق بكنوز كسرى وقيصر ( أي هزيمة اكبر دولتين ) في ذلك الزمان .. ولكنه لم يستعجل وقال سنحاربهم الان ونفتح بلادهم . والرسول صلى الله عليه وسلم انتقل الى جوار ربه وهو لم ير ثمرة نجاح رسالته وانتشارها الى مشارق الارض ومغاربها .
2- كارل ماركس .. بدأ بكتابة افكاره وحاول ان ينشرها ولكنه كان يطرد من بلد الى بلد ويعيش في حالة يرثى لها من الفقر والمرض وتم انتقاد افكاره والسخريه منها ، ولكن بعد وفاته انتشرت افكاره انتشار كبير جدا .. فمات قبل ان يرى ثمرة نجاح افكارة وانتشارها .
3- أعتقد بان الفرد نوبل لم يرى ثمرة جائزته وهو الذي قرر ان يبدأ بها بعد ان ظلم البشرية ( باعتقاده ) حينما اكتشف الديناميت .. ولكنه لم يرى هذا الانتشار والصيت لهذه الجائزة .
4- اسحاق نيوتن لم يرى ثمرة نجاح اكتشافاته التي اكتشفها والتي تدرس في كل دول العالم الان .
5- الجوكر في باتمان ماشاف ثمرة نجاحه في الفيلم ( انتحر مبجر ) ..:)

هؤلاء مجموعة من الاشخاص الذين لم يكتب لهم ان يروا ثمرة نجاحه ، ولم يتعجلوا هم عليه ..

هذا ماعندي ، وتمنياتي بقراءة ممتعة .. وبانتظار تعليقاتكم ..

الخميس، 4 سبتمبر 2008

عيش على قدك

قبل اسبوع بدأت بكورس لغة انجليزية في احد المعاهد في الكويت .. تدرسنا مدرسة امريكية عمرها في نهاية العشرينات ..

أمس قالت ان النساء العربيات يتفننون في لبس الاكسسوارات ، بينما الامريكيات فهم سيئون في ذلك ..

فكرت في كلامها فوجدت ان العرب عموما وأهل الخليج خصوصا شعب يهتم بالمظاهر ( يعني مكتشف شي يديد ) .. بس المشكلة الكبيرة ان الاكسسوارات اللي يشترونها سعرها غالبا مايكون غالي ومكلف .. والمشكلة الاكبر ان الناس الي عندها فلوس والناس العادية كلهم يبون يشترون ويكشخون .. وطبعا هذا الشي حده غلط .. فعلى سبيل المثال :

قبل كان اللي يسافر أوربا أو أمريكا هو الشخص اللي الله ميسره ومفتوح له باب الرزق .. الحين كل البشر يروحون يتسيحون هناك ... حتى لو ياخذ له قرض حق هالسفره ..

شغله ثانية .. الحين السيارة صارت مو مقياس حق الشخص اللي يملك أو لا .. فعادي تحصل شخص معاشه 500 شاري سيارة ب 40ألف ..

أو مثلا لبس الماركات والبواكه وعزكم الله النعل والجواتي .. بس يبي يكون غالي وماركه وهو مايملك .. عشان يصير مثل الناس ..


إنزين ليش قاعد يصير جذي .. لان الشعب يحب المظاهر ومايتمنى ان يشوف احد اكشخ منه ولا مسافر مكان هو ماراح له .. فتلقى شاق نفسه اقساط وقروض عشان بس الناس ميصيرون احسن مني ..

إنزين ياخي الله سبحانه وتعالى خلق الناس مختلفين ودرجات .. فمعناته انك مو لازم تكون مثل كل الناس ..

وبعدين وين القناعة .. ياخي اطمح ان يكون عندك وانك تكشخ وتسافر بس اجتهد عشان هالشي .. وإذا ماكان عندك فخلك قنوع بماعندك ..

بصراحة في كلمة حق عدنان المسلم قالها في مؤتمر رائد وتجربة2 ( قال: ان بنتي من 85 إلى 92 ماركبت طيارة لاني ماكنت املك فلوس أقدر اركبها ، بس ماشاء الله عليه الحين الله يبارك له ويزيده )


إنزين واحد بيقولي انا املك وبفسفس الفلوس مثل ماأبي .. ردي عليه يقول ، انك إذا كنت تملك فالله يهنيك .. بس في شي معقول .. وفي شي يسمى تبذير .. يعني مثلا بتقولي باشتري (عزك الله ) جوتي ب250 دينار .. اقولك لا هذا تبذير والله مايرضى .. مو معناته انك تملك خلاص قط ولاتفكر باللي قاعد تقطه ..

وهذا البذخ اللي مع الاسف نشوفه في العروس مثلا .. مايصير الصرف يكون جذي خيالي .. أو مع الاسف إستقبال الولادة اللي بالمستشفى .. شنو يعني بشتري cover ب2500 دينار بس حق هالاستقبال وبعدين بقطه لان خلاص الناس شافوه ..


طبعا انا اقول هالكلام والعيد ياي قريب .. يعني الناس راح تشتري تشري وبتجهز وعطني مظاهر حزتها .. شغلة ثانية .. اللي قاعد يصير بتنزيلات فيلا مودا .. الله مايرضى ان المنطقة الحرة صارت وايد وايد زحمة عشان الناس تبي تشتري ( مظاهر ) ..


الله المستعان


===================

حكمة الاسبوع :

بصراحة ماأدري وين قريتها :

يهدم الصدر الضيق مايبني العقل الواسع .


===================

كتاب الاسبوع :



كتاب يضع فيه الشيخ محمد الغزالي يده على الجرح .. ويحدد مكامن الخلل والامور التي ليس لها دخل في الدين وكيف تم ادخال العادت والتقاليد كجزء من هذا الدين .. كل هذا طبعا باسلوب الشيخ الجميل ونقده الحاد ..

انصحكم بقراءته ..

الاثنين، 1 سبتمبر 2008

احترت في امرك

تحديث ..
مدونة جنوب السرة لعرض حقائق المصفاة الرابعة .. تابعوها
http://jnobalsora.blogspot.com/

=================

أول شي كل عام وانتوا واهلكم واللي يعزون عليكم بخير .. وكل عام وانتوا إلى الله اقرب ..
دش شهر رمضان وبدأ معاه أو قبله كل واحد وشنو قاعد يخطط حق هالشهر .. اللي مخطط يختم القرآن 3 مرات واللي مخطط يختم القرآن مع قراءة التفسير واللي مخطط بيحفظ العدد الفلاني من الاجزاء واللي مخطط يحضر كذا درس او حلقة علم .. وعلى الجانب الثاني في اللي مخطط يشوف كل المسلسلات أو يشارك بكل المسابقات أو يلعب في كل الدورات الرمضانية ..
في النهاية كل شي باجره وميزانة .. ورغم انفه من ادرك رمضان ولم يغفر له ..
ومره ثانية كل عام وانتم الى الله اقرب
====================
بعد فترة شد وجذب تمكن مني العبد وخلاني ادش الفيس بوك .. وبالضبط انا واحد وايد يديد عالموضوع .. فاللي عنده اي نصايح او ارشادات لايبخل علينا فيها :)
====================
ياجماعة اللي صار امس وأول امس بالدوريات الاوربية شي مو معقول ..
في الدوري الانجليزي تشلسي وليفربول تعادلوا
بالايطالي انتر واليوفي تعادلوا وميلان خسروا
بالاسباني برشلونة ومدريد خسروا .. شنو السر بالموضوع .. الله اعلم ..

ودام ان احنا بالكرة .. ياجماعة شفتوا زينت سان بطرسبورغ جدام مانشستر .. وشفتوا البرتغالي داني شنو سوا .. وشفوا ارشيفين عقب مادخل شلون عفس الوضع ..

====================

ندخل بالموضوع ..
كنت قد ذكرت في بوست سابق ان انا عندي قائمة فيها الاشخاص اللي ودي اقابلهم .. بعدها تطور الوضع وصارت القائمة لأشخاص ودي اشتغل معاهم أو على الاقل اكون مرافق لهم.. والحمدلله تحقق لي هذا الشي ، ومن هالاشخاص في ناس تتعلم وتستفيد منه بكل شي يسوونه .. يعني فعلا ينطبق عليه كلمة مدرسة .. مو هذول الاشخاص اللي انا بتكلم عنهم .. انا باتكلم عن النوعية الثانية .. واللي هي النوعية اللي بعد ماتكون قريب منه تكتشف ان هالشخصية مختلفة تماما عن اللي تعرفها ..
على سبيل المثال ، شيخ دين وداعية من أكثر الدعاة نجاحا ، ومن الاشخاص اللي يشدونك باسلوبهم وبغزارة العلم اللي عندهم ، تستغرب لما تيي تتعامل معاه .. فهو صعب التعامل جدا .. الى درجة ان عادي ايي ويهزأ فيك جدام الله وخلقه ..
أو مثلا شخص كنت تسمع عنه كل الخير وانه واحد من افضل الناس تعاملا .. فما ان تبدأ معه في تعامل مالي .. تجده يغش ويكذب ..
أو شخص كان راقي في التعامل .. فما ان تقترب منه فتجده يتكلم عن هذا ويسب هذاك ..

بعد فترة من التأمل مع هذه النوعية من الاشخاص وصلت الى قناعة ان في مجموعة من الاشخاص اللي هم ربعك الخاصين حيل .. هذيلي اللي تحاول تتقرب منهم وتعرف عنه وايد شغلات .. اما الناس الباقي ( وخصوصا الشخصيات العامة ) فخل علاقتك معاهم من بعيد إلى بعيد .. عشان تظل تحترمهم .. وهذا الكلام ماينطبق على الكل طبعا ..

بصراحة هذي فكرة قصيرة موجودة في بالي وماقدرت اعبر عنها باكثر من جذي .. بس ان شاء الله تكون وصلت الفكرة ..