ياناس .. ياهو .. تكفة لاتكيلون بمكيالين !!

بسم الله الرحمن الرحيم ..

قال تعالى :{يَا أَيُّهَا الَّذِينَ آمَنُوا إِن جَاءكُمْ فَاسِقٌ بِنَبَأٍ فَتَبَيَّنُوا أَن تُصِيبُوا قَوْماً بِجَهَالَةٍ فَتُصْبِحُوا عَلَى مَا فَعَلْتُمْ نَادِمِينَ }الحجرات6

استغربت حدي من طرح بعض الناس عموما وبعض المدونين خصوصا حول موضوع غزة واحداثها .. واستغربت اكثر بعد كلامهم حول الاحتفال اللي صار يوم الاثنين في حولي بارك ..  واللي خلاني استغرب وايد هو شلون الناس قاعدة تكيل بمكيالين وبشكل واضح وفاضح .. 

اول نقطة اثارت استغرابي هي ان الناس اللي قاعدة تتكلم عن البرنامج قاعدة تتكلم وتنتقد تنظيم حدس او جمعية الاصلاح او الاخوان المسلمين بصفتهم هم المنظمين للبرنامج .. بينما تنظيم البرنامج كان من قبل اللجنة الوطنية المشتركة لنصرة فلسطين المنبثقة من القوى السياسية في الكويت .. فليش النقد توجه باتجاه الاخوان المسلمين بروحهم .. ولا لان الحين صاروا كل الناس تطقهم فالناس اللي قاعد تنقد قالت خلونا نطقهم على هذي بعد ؟

ثاني نقطة : انا افهم ان النصر يتحقق بتحقيقك لاهدافك .. واذا انت كنت الجيش المعتدي فبطبيعة الحال راح يكون عندك اهداف تبي تحققها واذا ماحققتها تعتبر خسرت وبطبيعة الحال يعتبر الطرف الثاني هو اللي انتصر .. وهذا اللي صار مع جيش الكيان الصهيوني اللي هو رابع اقوى جيش في العالم دخل غزة وماقدر يحقق اهدافه بنزع سلاح المقاومة والقضاء على حماس .. وبالتالي اخفق في تحقيق اهداف .. بطبيعة الحال دائما تكون الخسارة في جيش المعتدي اقل بكثير جدا من خساذر المعتدى عليها .. فموضوع ان قتلوا من الفلسطينيين وايد اكيد ان هذا الشي راح يصير .

ثالث نقطة : قضية السيدة ام منيرة .. الحين انا مسوي احتفال حق قضية عاجبتني ومقتنع فيها ، ماراح ارضى ان واحد مو عاجبته القضية يدش يخرب علي .. هذا برنامجي وطول مااني ماتدخلت في حريات الناس وماتعديت اي شي غير قانوني او شرعي فمالك اي حق انك تخرب علي .. وعلى فكرة نفس السيدة طلبت الكلام بكل ادب واحترام في ندوة حدس اللي كانت يوم الخميس الماضي بجمعية المحامين وتم اعطائها المجال لتتكلم بكل راحة وحرية ومن دون اي مقاطعة .. ليش ؟ لانها طلبت الكلام بطريقة مؤدبة وماقاطعت الناس اللي قاعدة تتكلم ..  وبعدين ليش لما بالمناظرات او الندوات يطلع واحد من الجمهور ويصارخ يعتبر طفل وسفيه ، ولما تطلع وحدة في برنامج احتفالي تطلع اخت الرجال وتسوى شوارب حماس كلهم ، مع ان الفعل نفسه .. وصار اللي تكلم عن المرأة ( وهو تصرف خاطئ لاشك ) قليل ادب ومومتربي واللي تكلم عن اي واحد خرب او حاول يخرب اي برنامج اما بالصراخ او بتعطيل الميكروفونات او ، او ... يطلع هو الحيادي واللي يتكلم بانصاف ؟

نقطة متعلقة بالنقطة الثالثة : وبعدين ليش صار عندنا خالد مشعل مايسوى غترة الشهيد وهو النصاب الدجال واي واحد يبي يسبه يقدر يسبه بينما ممنوع انك تتكلم عن ام منيرة ؟ ليش بالله هل لانها هي كويتية وهو لا .. شنو هالتفكير الضيق .. انزين اذا بس لانها كويتية عيل ليش النقد طال القطان والعنجري وماطالها .. مع ان كلهم كويتيين .. طبعا انا مومقتنع بمبدا لانها كويتية بس .. بس حق اللي منطقهم جذي ..

رابع نقطة : الله ياكثر التعليقات اللي قالوها الناس على سالفة بيع كوفية اسماعيل هنية ، ليش ماسمعنا هالتعليقات على بيع غترة الشهيد بعد ، ولا هم لانه كويتي .. !!!

خامس نقطة : قناة سكوب هي اكثر قناة حاشها ضرب وطنازة ، الحين يوم قابلوا ام منيرة وباعوا وفتحوا مزاد عليها صارت القناة عادية .. انزين وبعدين ليش نشكك بذمم لجان الزكاة وماراح ندفع الا حق الهلال الاحمر ، بينما قناة سكوب اللي مو مصرح لهم بتجميع التبرعات صار عادي ندفع لهم ، اقلب السؤال على المعترضين على لجان الزكاة ، شنو الضمان ان الفلوس بتروح حق المساجين وماراح تاخذهم فجر السعيد او احد من جماعة قناة سكوب ؟

ياناس ياعالم تكه تكفه لاتكيل الامور بمكيالين .. خلونا نقول حق الصح صح والغلط غلط .. مو لاني ضد حماس او الاخوان او ايا كان يطلع موقفهم كله غلط واي شي غلط احاول البسه اياهم .. 

يقول خالص شلبي : الحكم على اخطاء الاخرين في منتهى السهولة ويمنح المرء شعورا جيدا .

في النهاية ارجوا ان النقاش مايتحول الى مواضيع ثانية . وانما يتم نقاش نقاط الموضوع نفسه ، كما ارجوا ان نناقش الافكار وليس الاشخاص . 

طبعا مو شرط ان الشخص اللي انتقد انتقد كل هالتصرفات .. بس ممكن يكون انتقد وحدة او ثنتين .. بس هذا الشي اللي انا لمسته من كل الاشخاص اللي تكلموا على هالموضوع .. 

وشكرا .