CLICK HERE FOR THOUSANDS OF FREE BLOGGER TEMPLATES »

الثلاثاء، 28 أكتوبر 2008

اللهم انصر الرأسمالية

منذ سنة ثانية جامعة .. ومنذ إنضمامي لقسم الاقتصاد .. قلت اني ساتخصص في مجال الاقتصاد الاسلامي وساحاول ان اقضي عمري في خدمة هذا المجال .. وكعادة الاشياء قبل الدخول فيها تعتقد انها سهلة ويمكن تنفيذها بسهولة .. لكن بعد التعمق فيها تكتشف مدى الصعوبة .. وهذا ماحدث حيث رايت ان الاقتصاد الاسلامي يفتقر الى اهم مقومات الاقتصاد الكلي .. صحيح انه لديه ادوات تمويلية ممتازه ، ولكنه يفتقر الى اطار تنظيمي كامل ..
ومما يذكر ان علم الاقتصاد يعتمد بشكل كلي على المعادلات الرياضية والمنحنيات البيانية.. ولكن كتب الاقتصاد الاسلامي التي اطلعت عليها لم اجد في ايا منها اي معادلة رياضية أو منحنى بياني ، بل يعتمد وبشكل رئيسي على النصوص من الايات والاحاديث فقط .. إذا علم الاقتصاد الاسلامي ناقص ويفتقر الى المقومات الاساسية ..
ومع بداية الازمة المالية العالمية بدأنا نسمع اصوات تقول بانها نهاية الرأسمالية وبداية ظهور الاقتصاد الاسلامي .. بينما كنت اقول في نفسي ( اللهم انصر الرأسمالية لسنوات قليلة قادمة ) .. لان نهاية الرأسمالية ستكشف وبشكل كبير ضعف الاقتصاد الاسلامي لإدارة اقتصاد كلي ..
الجانب الاخر .. هو مايخلط بينه الكثير من الناس .. حيث نرى دفاعا مستميتا عن شركة تمويل اسلامية او بنك اسلامي .. وعندما تتكلم عن هذه المؤسسة وتنتقد ياتيك الرد الصارم .. ( انت مو مقتنع بالاسلام !! ) .. ليس معنى ان الشركة الفلانية مكتوب في أغراض الشركة انها تعمل وفق احكام الشريعة الاسلامية يعني انها معصومة عن الخطأ .. ففي النهاية هي شركة قامت من اجل الربح .. فلايعني ابدا انها بعيدة عن النقد ..
بالنسبة لي أرى ان قضية المال يجب ان يكون مال حلال .. ولذلك آخذ باكثر الاراء تشددا في مثل هذه الامور حتى لاينطبق علي حديث الرسول صلى الله عليه وسلم ( .. ومأكله حرام ومشربه حرام وغذي بالحرام فانا يستجاب له ) أو كما قال صلى الله عليه وسلم .. ولكن هذا لايمنع من ان انتقد هذه الشركات أو ان احاول ان استفيد منها باكثر قدر وذلك عن طريق محاولة تحسين أدائها ..
نقطة مزعجة في قضايا الاقتصاد الاسلامي .. هي آلية اتخاذ القرار في المؤسسات الاسلامية .. يجب ان يمر القرار على الهيئة الشرعية وذلك من اجل ضمان عدم وجود محظور شرعي بها ( يعني ولاية الفقيه ) .. ولكن المشكلة ان هذا الشخص الذي سيقرر بالموافقة او الرفض على استثمارت أو صفقات بمبالغ خيالية .. ليس لديه ادنى معرفة بعلوم الاستثمار .. فقط يرى النصوص الشرعية ويحكم .. ويكون غالبا من خريجي الشريعة ( يعني دارس أصول فقه أو أصول دعوة ) .. ( وهذا ليس طعنا بهذه الكلية ، وانما محاولة غرس مفهوم التخصص ، فكل شخص يتكلم في مجاله ) .. يبقى ان هناك مجموعة من الهيئات الشرعية التي تتكون من اشخاص درسوا الاقتصاد ومن ثم تخصصوا بالجانب الشرعي ، وهذا هو مانريده فعلا ..
والحل !! اعتقد ان الوقت قد حان فعلا لتظافر الجهود من اجل تكوين اطار كامل وشامل للاقتصاد الاسلامي ، حتى نستطيع ان نقدم البديل للعالم ونبرهن على قوة اقتصادنا وعقيدتنا ..
مرة اخرى اقول واكرر .. انا مؤمن تماما ان الحل الاسلامي هو الحل الامثل ولكن اين هو الحل الاسلامي .. فعلى سبيل المثال ، اعتقد انه من التفاهه ان نرى من يقول بان هناك علم مشتقات اسلامية .. فالمشتقات اساس قيامها حرام .. لذلك اعتقد انه بدلا من تعديل ادوات الاقتصاد التقليدي ان نقدم أدوات جديدة ومبتكرة ممكن ان تفيد السوق ..

اتقبل انتقاداتكم واراءكم بصدر رحب .. ومشكورين
=================
حكمة الاسبوع :
التميز لايعني الاختلاف وانما التفوق ..

الأحد، 26 أكتوبر 2008

الله يستر من الياي

لأول مره من بدت الازمه الماليه احس بالاحباط .. وانها صج ازمه ماليه .. يعني الله يستر .. ومثل ماان بنك الخليج هو اول ضحية .. فقريبا جدا في ضحية ثانية .. والله يستر من اللي بعده ..
بعدين الحين شنو باقي بالديره .. بنك وفلس .. واقتصاد منهار .. ورياضه وجمدوا اتحادنا .. وآخر شي يا احمد المليفي وعفسها اكثر بتقديم استجواب بهالفترة .. يعني الله يستر صج ..
انا هني موقاعد انتقد الاستجواب بذاته .. وهو حق دستوري له .. بس اعتقد ان الوقت وايد سيء حق تقديم الاستجواب ..
عموما .. اللي حصله مكان زين حق الهجره خل يقول لنا .. عشان يمدينا نلحق قبل الزحمة ..

وأزم يا مأزم ..

الأربعاء، 22 أكتوبر 2008

وناسة + سؤال مهم

أمس كنت في يوم مزدحم جدا .. من طلعت من البيت الصبح حق الدوام وعندي شغلة ورا الثانية .. وماخلصت شغلي الا على موعد للعشا مع واحد من الشباب ( وكنا متواعدين لأن عندنا شغله نبي نرتب لها ، يعني هم شغل ) .. طلعت من ماكي المارينا 9:40 بالليل تقريبا .. وانا مو مريح كلش .. والمشكلة ان واحد من الشباب كان مسوي عقيقة ( تمايم ) حق ولده .. وكانت مباراة اليوفي والريال .. فقلت من التعب راح ارد البيت وان شاء الله يعذرني صاحب العزيمة .. دشيت البيت وشفت الشوط الاول .. وبعدها نال مني التعب اقصى مانال .. فقلت راح اضحي بالمباراة وبروح انام مبجر ..
قمت اليوم حق الدوام قمة بالنشاط والحيوية ( الله يديمها ان شاء الله ) وبالطريج مع إن كان وايد زحمة بس كنت حدي فرش ومرتاح وماتضايقت من الطريج اللي خذا 40 دقيقة تقريبا .. ونفس الشي بالدوام اتغشمر مع هذا واتحرش بهذاك .. فالحمدلله وايد صاير مرتاح ..
وهذا كله ببركة النوم المبكر ( بعد الله سبحانه ) ..
نصيحة جربوها .. نام بكير تصحى بكير ، شوف الصحه كيف بتصير .. :) صج هالمثل صحيح 100% ..
المشكلة ان اليوم بالليل عندي 3مواعيد كلها مهمة .. ماأدري شنو راح اسوي فيهم :(

----------------------------
عندي سؤال واحتاج اجابة كل واحد يمر على المدونة ضروري جدا جدا ..
شنو باعتقادك اسباب تخلف المسلمين ؟ وشنو الحل لها ؟
تكفه اي واحد يمر هني حتى لو ماعلق ولا مره ابيه يجاوب على هالسؤال ..

مشكورين وايد وايد مقدما :)

الأحد، 19 أكتوبر 2008

بدون عنوان


لايزال مزاجي للكتابة مش ولا بد .. فالله يعينكم علي :)


--------------------------

هالايام قراراتي صايرة تطلع بسرعة وبدون تفكير طويل .. والله هالشي مريحني وايد :) ..


قبل جم يوم مواعد ربعي الاعزاء ان نطلع نتعشا لأن من باجر واحد منهم راح يسافر .. الى العصر والوضع اوكي .. ماأدري شنو اللي صار فجأة جان يعتفس المزاج مره وحدة .. واصير حدي مستعسر .. ومشكلتي اذا استعسرت اخلي الطلعة تصير حدها مليقة .. بس ذاك اليوم احترمت نفسي وقلت راح اكون ساكت وماراح اخرب عليهم طلعتهم اللي كانوا مستانسين فيها .. ولله الحمد نوعا تحقق اللي كنت ابيه ..

بعدين جان افكر ان ليش في شي يضيق خلقي .. من يصير اي شي يضيق الخلق على طول هده وشوف لك شي يونسك غيره .. لان الدنيا وايد اصغر من ان يضيق خلقك على شي فيها .. فتوني بادي بهالشي بس احس اني مرتاح .. ودعواتكم ان اكمل على هالطريقة :)


-------------------------

بعد ماعانيت ماعانيت من المواعيد المتاخرة .. وبعد مانطرت كثر مانطرت اوادم ويتاخرون علي ب30 و45 دقيقة .. قررت قرار وراح يسري على الجميع ان شاءالله ..

من تتاخر علي لمدة ربع ساعة فاعتبر ان الموعد انلغى .. لاني بالضبط راح امشي واشوف لي شي ثاني .. بتقولون لي انك وايد مثالي بقولكم اني انا احترمك واحترم الوقت .. وانت لاأحترمتني ولا احترمت الوقت .. فيعني دبر حالك أو احترمني .. :)


------------------------

رحت مكتبة ذاك اليوم وسألت اللي يبيع قلت له ابي كتب عن اسباب تخلف المسلمين فرد علي رد قتلني

: قالي افتح اي كتاب تحصل تخلفهم موجود فيه !!!

بصراحة الرد كلش ماكان متوقع .. بس كان قاتل ..


-----------------------

سمعتوا عن الاهبل الالماني اللي يبي يبيع السفارة الامريكية اللي بروما ..

شوفوا هالخبر وشوفوا شلون الادمي مصيود ، او قاعد يصيد العالم :)



-----------------------

حكمة اليوم :

ان المشكلة دوما ليست في الطغاة بل في الجماهير العمياء .

الثلاثاء، 14 أكتوبر 2008

2 seas

الوضع عندي حده زحمة .. بالدوام وايد شغل وزحمة ، عقب الدوام مو قادر اسوي شي من كثر الشغل اللي عندي .. هذا بالاضافه الى التغييرات اللي سويتها في حياتي .. صاير النوم مبجر ، العلاقة مع التلفون مش ولا بد .. وفوق كل هذا قاعد اشتغل على بروجكت كبير .. بس دعواتك اخلصه ، لانه صج راح يكون بروجكت ضخم :)

------------------------------
مفكر بهالبوست من فترة ، بس مالي مزاج اكتب .. ليش لأان مثل ماقلت لكم وايد زحمة ..
------------------------------
كعادتي كل سنة اول يوم العيد اكون حاجز حق مطعم حق العشا ، هالسنة شديت حيلي وحجزت بالتسيمو ( المطعم الايطالي اللي ببرج النصار ) رحنا كنا 7 ، قعدنا تقريبا نص ساعة عشان ايي ياخذ منا الطلب ، وبعدها ساعة وشوي عشان اييب لنا الماي ، وآخر شي ماياب لنا الطلب .. وطع هالشي صاير حق كل اللي بالمطعم ... صج صج شلته من بالي تماما ..

------------------------------
ثاني يوم العصر قررنا نروح البحرين .. وآخذ جمس يدي موديل 93 .. وندزه .. قلنا بنمشي مبجر عشان بنشوف مباراة دوري ابطال اوربا بالخبر ببيت واحد من الشباب اللي ويانا ( واول مامريته قلت له وين المفتاح قالي عند اهلي هناك ) .. وصلنا الحدود على ال5 تقريبا .. والحمدلله كان الوضع وايد سهل .. وطفنا مرتاحين من حدود الكويت .. اول ماوقفنا بحدود السعودية ولا واحد يأشر لي يقول ترى الراديتير قاعد يخر ماي .. أشوف الحرارة .. ولا فوق الثلاث ارباع .. طفنا حدود السعودية ووقفنا نحاول نسوي شي .. كل مانوقف عند بنشرجي .. يقولنا مااقدر اسوي شي .. المهم واحد من الشباب اجتهد وفتح لنا الراديتير ولا يطلع حده فاضي .. ترسناه ماي وقلنا بندش الخفجي بنشوف شالسالفه .. رحنا الصناعية هناك ولا كلهم مسكرين الا واحد قلناله شالسالفه ولا يطلع الهوز اللي يوصل من الراديتير مقضوض وقاعد يخر .. بس ماعنده قطع غيار ، رحنا محل قطع غيار قال ماعندي .. دقيت على واحد من الشباب قلت له نبي حل حق المشكلة .. قالي اشتر تيب وسلكون وارقع فيه الهوز .. وراح يوصلك الى الريضا .. المهم بعد معاناة طويلة ضبطنا الموضوع .. بس احتياطا سكرنا التكييف .. واشوه ان الجو كان معقول .. وصلنا كورنيش الخبر 12:30 تقريبا .. واكيد ان المباراة طافتنا .. قلنا بنتعشى ونروح السكن .. يوم وصلنا قلنا حق صاحب البيت دق على اهلك خل يطلعون لنا المفتاح .. دق عليهم .. ولايقولون له المفتاح مو عندنا .. عند اهلك بالكويت .. حلوووووووه .. المهم خلصنا العشا عال2:15 تقريبا .. وقلنا مالنا الا ندش البحرين هالحزة لان ماكو احد .. رحنا ولا الحدود كان فيها زحمة شوي .. طفنا الحدود ووقفنا عند مال الحجوزات اللي على الجسر نبي شقة او غرفة او اي شي .. قالنا كلش مافي ولا شي .. روحوا ودبروا حالكم ... بعد ماحسنا شوي .. طلع ويانا شقتين بسعر جيد .. دشينا السكن عقب اذان الفير بشوي ..

--------------------------------
طبعا مايحتاج اسولف ابحرين شلون صارت وايد احسن .. والشركات والبنوك اللي فيها شلون قاعد تشتغل .. بس هناك كلينا بمطعمين بصراحة وايد حلوين .. الاول اللي هو ميت كومباني اللي بالبيوت القديمة اللي بالعدلية .. وهو مطعم ستيكات موجود بدبي بمدينة الجميرا ، وبيفتح ب360 بالكويت .. لحمته وايد حلوة واكله جدا جميل ..
والمطعم الثاني اللي هو فاير اوف برازيل اللي بمجمع السيف ..

-------------------------------
طبعا كان اهم هدف من السفرة غير تغيير الجو والوناسة هو زيارة المكتبات وشراء الكتب .. رحنا المكتبة الوطنية اللي بشارع المعارض وشرينا منها ( والزين فيها ان اغلب الكتب الممنوعة بالكويت تحصلها هناك ) .
وبعدين رحنا مكتبة العبيكان بالدمام وهم شرينا منها مالذ وطاب من الكتب :)

------------------------------
طلعنا من المكتبة يوم الجمعة بالليل عال11 تقريبا .. وتعشينا بالارنب الجائع .. وقلنا بنمشي عقبها على طول .. وطبعا تاليف عشان نمسك حق الكويت من الدمام .. ولكن الخبرة والقيادة( والتشير شوي ) عند بومحمد حطتنا على الطريج الصح .. أول مامسكنا الخط جان يبنشر علينا التاير ( قلنا الله يستر .. ) بس الحمدلله ان البنشر كان عقب محطه ب300 متر تقريبا .. رحنا المحطة مشي وقلنا له نبي نبدل تاير جان يقول لنا مال التواير ان انا بسكر ومالي شغل فيك .. مني مناك الله يخليك .. مانفع الوضع كلش .. قلنا احنا نبدله بروحنا بنحط الجيك .. والشباب تاليف وكل واحد يقول مكان .. الا انا لاني كلش ماأفهم بهالسوالف .. لما قالنا بومحمد ان نحطه هني كل الشباب قالوا لا نحطه بمكان ثاني .. المهم حطيناه ولا يطلع قصير ومايوصل ومومال جمس .. قلنا مالنا الا نوقف واحد عشان يعطينا جيك .. ولا جزاهم الله خير 2 سعوديين يوقفون لنا وهم بروحهم بدلوا البنشر لنا .. واحنا واقفني نطالعهم .. طبعا طلع مكان الجيك هو المكان اللي قال عنه بومحمد ( بركاتك ياحج ) :) .. وبعد جهد وعناء مشينا .. بس التاير مو متفوخ عدل ..وقفنا بمحطة وتفخناه بس هم شكله ماكان مطمئن .. قبل مانوصل الكويت بتقريبا 60 كيلو .. ولا يبنجر علينا التاير الثاني .. واكنت الساعة تقريبا 4:30 .. المرة الاولى التاير تقطع كله تماما .. المره الثانية انصلخ شوي بس في مجال انك تمشي عليه خفيف .. وقف لنا تاكسي وقال لنا امشوا خفيف وانا الحقكم مشينا شوي شوي ولا التاكسي يقول ان اللي معاه مستعيلين ويبون يروحون الخفجي فانتوا كملوا امشوا وانا راح اوديهم وارجع لكم .. بعد مامشينا تقريبا 15-20 كيلو ولا يروح التاير خلاص .. وقف لنا واحد وكان الحل ان ناخذ التاير ونوديه حق اقرب محطه نبدله ونييب جيك تمساح ونركب اليديد ونرجع الجيك مره ثانية .. المهم اللي راح مع اللي وقف لنا خذا معاه التاير وخذا معاه مفتاح السيارة بعد ليش لاتسألنا .. بس يوم درينا ان خذا المفتاح جان نموت من الضحك .. المشكلة ان الشمس بدت تطلع والوضع بدا يصير حر .. وانا كلش مو نايم شي يذكر خلال ثلاث ايام .. والله وصل وبدلنا التاير بجيك تمساح .. وانتهت بذلك فصول العيد اللي كلش ماترقعنا فيه ..

بس نسأل الله ان تكون كل هذه الازمات مما يكفر الله به الذنوب ..

-------------------------
ادري ان اغلبكم وده يقولي انزين وشتبي يعني .. بس بصراحة هذا اللي صار لنا بالسفرة .. وانا وايد مشغول فقلت كتابة هالاحداث توخر عني شوي الشغل اللي كله جاد .. واستانس شوي لما تذكر هالاحداث ..
وأهم شي لأن بومحمد قالي ابيك توثق هالاحداث اللي صارت :)

أهم نقطة بالسفرة .. اني من سنتين تقريبا مو مسافر مع بومحمد .. وفعلا استانست معاه .. ربي يحفظك يابومحمد .. يوفقك بكل عمل قاعد تسويه :)

نقطة اخيرة ومهمة جدا ( بالنسبة لي ) : عيسى ، خليفة ، عمر ، محمد ، يوسف .. راح افقدكم وايد وايد .. استمتعت معاكم جدا جدا خلال هذي السنة .. ربي يوفقكم ويحفظكم .. ولاتنسوني من دعواتكم ..

------------------------------

try not to become a man of success but a man of value . Einstein



موفقين