المادة 36 من الدستور :)

من فكرت بفكرة اني يكون عندي مدونة خاصة فيني بدأت الافكار تحوس بخاطري .. هل تكون مدونة شخص غير معروف ولا أقول حق البشر ان هذا انا وهذي مدونتي .. وبعدها فكرت هل اقول كل الافكار اللي في بالي ولا لازم افكر بالبشر وشنو راح تكون ردة فعلهم .. وبعدها فكرة ان لازم احترم كل الاراء ولا في اشياء ماتستحق الاحترام ولازم نهاجمها ..كل هذي التساؤلات واكثر مرت بخاطري ..

طبعا راح تسألون شنو اللي طلعت منه بعد كل هذا ..

راح اقولكم التالي :
1- انا مو مقتنع بسالفة ان تكون عندك شخصيتين ..شخصية حقيقية وشخصية حق الانترنت .. يعني مو ادافع عن شغلات بشخصية الانترنت بس بشخصيتي العادية اظل ساكت .. فعشان جذي ماطولت بالتفكير في شكل مدونتي وصرت اسولف حق الناس اني انا صاحب مدونة دوار الشيراتون .

2- النقطة الثانية ، دار حوار بيني وبين شخص عزيز هو صاحب مدونة الديوانية ( الله يرده بالسلامه ، بس انا شرهان عليه شوي ) قالي ليش كتبت جذي وخليت الناس تراددك بالموضوع .. قلت له هذي مدونتي وافكاري .. كل اللي ابي اسويه اني ابي اكتب افكاري واستمتع لما الناس تناقشني بهالافكار .. بس اذا في واحد بيهاجمني وموعاجبته افكاري .. هو موملزوم يدش عندي ، وايد سهل الموضوع ..

3- اما موضوع احترام كل الاراء .. لاحبيبي مو لازم احترم كل الاراء .. يعني على سبيل المثال واحد ياني وقعد يسب الاسلام ولايسب الكويت .. ماراح ارد عليه وأقوله والله رايك وأحترمه .. ممكن اني اكبر راسي عليك وأوخر عنك .. بس كلش ماراح اقولك والله رايك وأحترمه .. لانه هالراي مايستحق الاحترام ..
======================
على النقطة الثالثة ..
أنا معروف من زمان اني حدي احب المناجر .. وأحب النقاش من اجل النقاش على اي موضوع .. بس من فترة صاير اي احد يناقشني ارد ردود تنهي الموضوع بسرعة ..
كنت قاعد اسولف مع شخص عزيز علي بس يخالفني التوجه تماما .. كان قاعد يقولي عن محمد هايف والطبطبائي ولجنة الظواهر السلبية ويقول ان ليش مايحترمون راي الاقلية في قضية الأختلاط .. قلت له تعال .. مو انت تطالب بحرية الراي .. ليش لما واحد منهم يقول اي راي تهاجمونه على طول .. ولا لأنه ملتحي فكلامه غلط وهو مايفهم ..
نفس الشخص استخدمت معاه طريقة ممتعة بالنقاش .. قاعد يقولي ان بيتهوفن اذكى شخص وان لماتسمع سمفونياته ترتاح وايد .. جان اقوله رايك وأحترمه .. بس انا عندي ان ياني وايد احسن منه .. جان يعصب و يقولي انت شلون تقول هالكلام عن بيتهوفن .. قلته كيفك انت تستانس على بيتهوفن انا استانس على ياني غيري يستانس على موزارت .. :) هني هو قالي لا هذا الراي مايستحق الاحترام :)

=================
وقبل لانخلص ..
ترى في خوش مجموعة مطاعم يديدة تستحق التجربة ..هي مطاعم شركة دانة الصفاة .. مكانهم مقابل ميس الغانم عالبحر .. التصميم والقعدة وايد حلوة .. خصوصا حق الشتا .. في قعدة عالبحر تصير جنك قاعد بكروز ..
واحد ايطالي اسمه دون ماريوز .. وايد حلو .. بصراحة الستيك والبيتزا والباستا والسلطة وكل شي لذيذ ..
الثاني فرنسي .. ماجربته بس قعدة خياليه .. والديكور وايد نار ..
الثالث تريدر فيكس .. هو مطعم اكل جزر .. يعني هاواي وهالسوالف .. وهو مشهور بالستيكات اللي مع خلطات الواين .. بس الكويت مافي هالشغلات مثل مانعرف .. اكله عادي .. ديكوره غريب ويونس.. خصوصا الفرن اللي حده كبير ..

أنصحكم بتجربتهم :)

موفقين