حدي مستانس ..

أول شي اعتذر عن الفترة الطويلة اللي ماكتبت فيها .. ماأدري شنو فيني .. صارت لي وايد اشياء تونس هاليومين ..ومع هذا كل ماأقول ابي اكتب شي .. أحس ان مالي خلق ..

أول هذي الشغلات .. أن صديقي العزيز تخرج من الجامعة بعد جهد جهيد ..طبعا سويناله عزيمة وعطيناه جم هدية .. أول مره اشوفه جذي مستانس ويتشكر منا هالكثر .. والله تستاهل يالعبد وهذا اقل من قدرك .. وعقبال مانشوفك وزير الخارجيه ان شاء الله :)

ثاني هالشغلات .. في ناس كانوا ماخذين عني فكرة سيئة جدا .. بس الحمدلله خلال الفترة اللي طافت قدرت اتعامل معاهم بشكل ايجابي وتغيرت الصورة والفكرة اللي كانوا ماخذينها عني بالعكس صاروا يستشيروني بامورهم الخاصه ..

الثالثه .. في ناس كنت قاعد اعلمهم وشفت ثمرة هذا التعليم .. شاركوا بمسابقة وفازوا فيها .. وبعد ماخذوا جوائزهم يوني وتشكروا مني وايد .. وقالوا لي انطر اللي راح اييك منا ..

الرابعة .. واحد من الشباب طحت معاه بشغل قبل 4 سنين .. وكان حزتها صغير ماهمه الا وناسته وبس .. خلص الشغل اللي معاه وافترقنا 3 سنوات .. رجعت معاه بشغل مره ثانيه قبل فترة وصار شخص ثاني .. رجل ونعم الرجل .. تعطيه شغل وتهده وانت مرتاح .. أمس ياني وعطاني هدية ، وقالي اني صج استفدت منك وعلمتني وايد ..

صج صج انا مستانس والدنيا مو شايلتني ..

===================

خلص الكورس الصيفي بالجامعه .. ومجموعة من الشباب اللي اعرفهم تخرجوا .. وكل واحد قبل مايتخرج كنت اقوله حاول تستانس كثر ماتقدر بالجامعة .. لانها صج هي احلى الايام .. وهذا الكلام اقوله وانا فعلا مقتنع فيه .. يمكن الوظيفة انت مستلم معاش ومرتاح من ناحية الفلوس .. وهم ماعندك شي تحاتيه بعد الدوام .. امتحان ولا هوم وورك ولا تقرير او بحث ..

بس ياأخي الجامعة حلوة .. اقلها اذا طق في بالك ماتبي تداوم ريح بالك وريح تريق بمارينا كريسنت .. ولا أول سنتين بالجامعة كان عندي اونس شي اني اروح الجامعة بس ماأداوم محاضراتي ..

بعدين العلاقات والشباب اللي تسولف معاهم بالجامعة .. صج صج الجامعة عالم ثاني .. :)

==================

اول ماتخرجت قلت خلاص بطلق الدراسة وخلاص مافي دراسة بعد اليوم ..

بس والله احس اني اشتقت لها .. وبعدين قاعد احس ان البكالريوس بروحه مايسوي لك شي .. فقاعد افكر اني ادرس بعد .. ومحتار بين cfa , mba .. هذا كله طبعا عقب ماأخذلي كورس لغة أعدل فيه وضعي شوي ..

احتاج ارشاداتكم .. ونصايحكم .. واللي عنده تجربة مع اي وحده فيه لايبخل علينا .. طبعا قراري ماراح يعتمد على كلامكم اكيد .. لاني مقتنع ان محد يعرف حق مصلحتي احسن مني .. :)

==================

بصراحة افتتاح الاولمبياد كان وايد حلو .. ويفتح النفس .. وخصوصا اللقطة اللي اليهال رسموا فيها لوحة .. كانت حدها نار ..

بس شلون شبوا الشعلة ماكانت وايد قوية .. وكنت متوقعها وايد احلى ..

وتبقى احلى وحده مالت برشلونة 92 ..