CLICK HERE FOR THOUSANDS OF FREE BLOGGER TEMPLATES »

الأربعاء، 22 أكتوبر 2008

وناسة + سؤال مهم

أمس كنت في يوم مزدحم جدا .. من طلعت من البيت الصبح حق الدوام وعندي شغلة ورا الثانية .. وماخلصت شغلي الا على موعد للعشا مع واحد من الشباب ( وكنا متواعدين لأن عندنا شغله نبي نرتب لها ، يعني هم شغل ) .. طلعت من ماكي المارينا 9:40 بالليل تقريبا .. وانا مو مريح كلش .. والمشكلة ان واحد من الشباب كان مسوي عقيقة ( تمايم ) حق ولده .. وكانت مباراة اليوفي والريال .. فقلت من التعب راح ارد البيت وان شاء الله يعذرني صاحب العزيمة .. دشيت البيت وشفت الشوط الاول .. وبعدها نال مني التعب اقصى مانال .. فقلت راح اضحي بالمباراة وبروح انام مبجر ..
قمت اليوم حق الدوام قمة بالنشاط والحيوية ( الله يديمها ان شاء الله ) وبالطريج مع إن كان وايد زحمة بس كنت حدي فرش ومرتاح وماتضايقت من الطريج اللي خذا 40 دقيقة تقريبا .. ونفس الشي بالدوام اتغشمر مع هذا واتحرش بهذاك .. فالحمدلله وايد صاير مرتاح ..
وهذا كله ببركة النوم المبكر ( بعد الله سبحانه ) ..
نصيحة جربوها .. نام بكير تصحى بكير ، شوف الصحه كيف بتصير .. :) صج هالمثل صحيح 100% ..
المشكلة ان اليوم بالليل عندي 3مواعيد كلها مهمة .. ماأدري شنو راح اسوي فيهم :(

----------------------------
عندي سؤال واحتاج اجابة كل واحد يمر على المدونة ضروري جدا جدا ..
شنو باعتقادك اسباب تخلف المسلمين ؟ وشنو الحل لها ؟
تكفه اي واحد يمر هني حتى لو ماعلق ولا مره ابيه يجاوب على هالسؤال ..

مشكورين وايد وايد مقدما :)

11 التعليقات:

enter-q8 يقول...

شنو باعتقادك اسباب تخلف المسلمين ؟ وشنو الحل لها ؟

ابتعادنا عن دينا كامل من سلوكيات و تعامل

و صار الدين عادة و ليس عبادة
متى ما رجعنا حق هالشغلات تنتهي المشكله

و نام بكير

molok يقول...

هلا طال عمرك ..

أشكرك .. ملاحظاتك في الصميم ..
وبس صارلي فترة وانا مطبق قاعدة النوم المبكر .. :)

مشكور وايد على الحضور السريع ..

أبو لطيف يقول...

عساك دوم مستانس

واي مبجر طال عمرك

اذا طالع من المارينا الساعة عشر الا ثلث

لا ... ورايح البيت وشايف شوط مباراة بعد

انا حدي الساعة عشر وبس

......

اذا صار اللي يصلون الفجر كثر اللي يصلون الجمعة تنحل مشاكلنا باذن الله

والله المستعان

molok يقول...

هلا ابولطيف ..
انا بالضبط 10:40 على الفراش .. وماطولت على مانمت .. لا انا كنت متعود انام 1 أو قبل بشوي ..

-------- وشنو الشي اللي يخليهم يصيرون جذي .. اعتقد في اسباب تخليهم يصلون الفير ..

مشكور وايد ..

Unknown يقول...

شنو باعتقادك اسباب تخلف المسلمين ؟ وشنو الحل لها ?

اسباب التخلف كثيرة

1- ترك الحضارة الاسلامية والعربية والركوض الى الحضارة الغربية

2- مما ادى الى فقدان الهوية الأسلامية من الشكل والمضمون


الحل ياخوك بالترشيــد :)

اقـــصد ما كو حل

ونووووووم العوافي يا بعد حيي وميتي

بانوراما يقول...

في رؤيتي الخاصة

اعتقد

ان اسباب تخلف المسلمين

اتباع الغرب

" همج رعاع ينعقون وراء كل ناعق" أمير المؤمنين ( ع)

Eng_Q8 يقول...

الحل هو قراءة التاريخ وانتعلم اشلون حلوا مشاكلتهم :) وضحت

eShamiYa_RockS يقول...

جينات .. الطقس الحار .. ميل العرب و الشعوب الاسلامية الى العاطفة أكثر من التفكير العقلاني .. جينات ..الكسل و أكبر دليل السودان.. بيئة الغرب ساعدتهم على التطور الحضاري قبلنا بمئات السنين .. جينات .. نفاق .. التبعية و الكسل .. عاطفيين ..جينات

مستعدة يقول...

- إذا كان الناس أصلا بعيدين عن الدين، فماذا الذي سيحركهم إلى البذل من أجل الدين.

- التفرقة بين الأجناس والتفكك الذي حدث حتى بين أفراد الدولة الواحدة، فلم يعد مصطلح "أنا مسلم" يوحد الأمة الإسلامية.

- كل دولة لا تهتم إلا بمصلحتها.

- فهم بعض الناس الدين بمنظور خاطئ وكأنه دين التخلف والبعد والزهد عن الدنيا وعدم الخروج لمواجهة الناس.

- المعطم مؤمن وبشدة بمفهوم أن وجوده لا يشكل فرق.

- عدم إحترام الوقت.

- حاجة المسلمين إلى قائد ناجح. : لم أكن أتصور الحاجة إلى هذه النقطة إلا عندنا شاهدت بعض الفيديوهات التي ذهلت بها بصراحة والتي كانت تظهر تجمعات ضخمة متفرقة في مدن إسلامية وكلها كانت ترفع شعار حاجة المسلمين إلى خليفة.

هذه بعض النقاط التي خطرت في ذهني في هذه اللحظة وعسى الله أن يعيننا على أن نكون قادة مصلحين..

ولا تنسى أن أيضا من أسباب سعادتك.. أنها بركة من استثمارك بوقتك ..:)
بارك الله فيك..

q8-analyst يقول...

السلام عليكم
اول شي ابي اتكبم عن سالفة النوم المبجر
انا جربتها
ووايد مفيدة
بس المشكلة ان الحياة بالكويت تبلش بعد المغرب بسبب جو الحلو بالنهار
يعني اذا تبي تنام الساعة 10 ما راح تكون سويت شي بيومك
كلها 5 ساعات شتسوي فيها
يا دوب تسوي شغلتين

اما بالنسبة لتخلف المسلمين باعتقادي ان الاسباب وايد
وما تقدر تقول ان في سبب اقوى من سبب ثاني لان كل الاسباب بنفس المرتبة
بس بنظري تقدر تحصر السبب في ترك السنة النبوية، لان من ترك السنة النبوية تقدر تقول ان المسلمين قاموا يقلدون الغرب
وان المسلمين قاموا يتبعون ملذات الدنيا ومن هالحجي

اسمحلي ملوك عالاطالة
وان شاء الله يعجبك رايي
سلام

غير معرف يقول...

شنو باعتقادك اسباب تخلف المسلمين ؟ وشنو الحل لها ؟

انا اتوقع شغلة وحده تحل التخلف والإختلاف الي في المسلمين

هو الحديث الشريف
أو الي معناه (( حب لأخيك ما تحب لنفسك ))

لو أنفكر فيها بعدها كل واحد يحب الخير حق الثاني
كل واحد ينصح الثاني
كل واحد يسمع من الثاني
.................
................
...............
.............
...........
.........
الـــــخ

لو الواحد يفكر بهالحديث صح ويفكر بالنتايج الي راح تصير

ما انفكر بمعنى الحديث وبس ونوقف