Crazy Trip

بعد نتايج الانتخابات اللي بالنسبة لي على الاقل تضيق الخلق .. واللي تحتاج إلى شهر من التحليل .. احتاج إلى راحة واستجمام وسفر ..
وبما اني صارلي فترة طويلة مو مسافر سفرة سياحة محترمة .. فبإذن الله يوم الخميس ان شاء الله راح ابدي مع اخوي رحلتنا المجنونة واللي راح تستغرق تقريبا شهر مابين اوربا وأمريكا ..

راح تبدي رحلتنا من الكويت الى فرانكفورت ، ونطلع بعدها الى جنيف بالسيارة ان شاء الله ، وبالطريق بينهم راح نمر على انترلاكن ، في جنيف واعدن د.نذير وراح يكون معانا ، وبعدها راح نطير من مطار ليون إلى فينيسيا وبعدها بنروح بقطار الى روما وان شاء الله بندش نهائي الشامبيونز ليج في ملعب روما ، وبعدها رحلة العودة إلى فرانكفورت بالطيارة من اجل الطيران إلى محطتنا القادمة . رحلة اوربا راح تاخذ منا تقريبا اسبوع .. عاد انت وزع الايام على الاماكن :)

وحق اللي مو قادر يتخيل الوضع عندك الخريطة وشوف شنو راح نسوي ..

بعد ما نطلع من فرانكفورت راح نطير بحيل الله الى بوسطن نريح فيها وبعدها بنطير الى سان فرانسسكو نقعد فيها جم يوم ونطير بعدها الى لوس انجلوس وهم نقعد فيها جم يوم وبنطلع صبحية يوم الى سان دييجو ونرد في نفس الليلة ، بعدها بنطير الى لاس فيغاس ونقعد فيها جم يوم .. وبعدها نطير الى اورلاندو نمتع حالنا بديزني ويونيفيرسال ونطلع منها حق ميامي واحلى بحر ، بعدها ان شاء الله نطير الى نيويورك ونختمها بالعودة الى بوسطن استعدادا للعودة الى الكويت ..

ونفس الشي الخريطة مبينه ادناه من اجل الاطلاع على خط السير المجنون ..

أدري انكم قاعد تقولون شنو هالميانين ، وادري انكم قاعد تحمدون ربكم على نعمة العقل ، بس انا اعتقد ان احنا راح نستانس جذي .. طبعا ولله الحمد خلصنا من كل الحجوزات من فنادق وطيران .. بس اذا في اقتراحات حق اي فعاليات ممكن نسويها هناك ، فكلي آذان صاغية لسماعها ..

وشكرا