رديت

ياجماعة الديره شي ثاني وخيالي .. انا صارلي تقريبا سنتين مو رايح .. الديرة بالنسبة لي صارت وايد يديده .. شارع الشيخ زايد كان مافيه الا الشيء القليل من المباني .. الحين تقريبا انترس ..

شغله ثانية .. الديرة فيها كل الجنسيات وكل الاشكال والالوان .. والبشر كلهم ينكتون على دبي .. ومع كل هذا الديره متحمله وشايله وماتشوف الزحمه بكل مكان ..

طبعا السوق .. ماتقدر تتكلم عنه ابدا .. 

نيي حق الشي القوي .. وماراح اتكلم عنهم وايد .. باخذ بس نموذج واحد .. 

http://www.thebutchershop.co.za/

باختصار .. احلى قطعة لحم كليتها في هالمطعم .. وايد لذيذ .. جربت  اصناف عندهم .. كل واحد فيهم من احلى الاشياء اللي كليتها في حياتي ..المطعم صاير بمول الامارات جبال السكي .. اسمه ذي بوتشر شوب اند جريل ..

يالعرزاله هذا اللي صج ينطبق عليه ان الاكل طابخينه بالجنه .. 

باختصار اللي يروح دبي ومايجربه جنه ماراح دبي .. وعلى فكره بيفتحونه بالافنيوز على بداية ٢٠٠٩ .. الشيف والمدير والستاف اللي بييون قاعد يتدربون ..

مدينة الجميرا .. احلى قعدة مطاعم وقهاوي شفتها في حياتي .. بس طبعا بشهر واحد والجو الحلو .. مو الحين وبعز الرطوبة .. التمشي فيها وايد حلو .. ومطاعمها احلى ..

وايلد وادي حدها حلوه وتونس .. انا اول مره اشوف زحلاقية تصعدك لي فوق .. العادة تنزل لي تحت .. صج شي عجيب .. بس التفصخ والتزلط هناك الله لايوريك .. يبيلك تروح مبجر شوي .. لانهم اييون على العصاري وتصير وايد زحمه .. 

طبعا انا كنت ساكن في كروان بلازا اللي بالفيستفال سيتي .. وايد حلو الفندق والفيو من الغرفة وايد حلو على الخور المجمع قريب منك ..بس مشكلته البسيطه ان اللوبي ماله وايد عادي .. 

 المنطقة يديدة فللحين مااكتملت .. بس الحلو انها على امتداد شارع الشيخ زايد .. 

حسافه ان يوم قلت بروح اسوي سكاي دايفنج وكلمت الكونسيرج عشان يحجزلي طلع لازم تحجز قبل يوم وكان حزتها المكتب مسكر .. يعني مايمديني احجز .. بس المره اليايه ان شاء الله ..

كان لي بعض المشاهدات اللي حبيت اعلق عليها وتفيدنا في الدنيا .. بس ارتبها ويمكن اكتبها مو اكيد ..

باقي اتشكر من اللي كان مسافر معاي .. فعلا كان مريح بالسفر كل شي يالله فوقه .. بس مشكلة النوم شوية تحتاج تعديل ..

اخيرا .. اقول حق العرزالة اني شفت فيلم شاوشانك هناك .. وكان فعلا خوش فيلم .. ويستحق ان يكون الثاني على مر التاريخ .. واللي ماشافه خل يروح يشتريه ويشوفه لانه وايد قوي ..

موفقين 

شوية سوالف

من فترة طويلة وعصيري المفضل هو عصير البرتقال .. بس بعد فترة بديت من اشرب عصير البرتقال أو آكله هو والمانجا ونوعا ما الرقي تقلب جبدي .. والكلام هذا صارله 3 سنين تقريبا .. والمشكلة ان انحرم من هالفاكهة اللي احبها .. صج ان مرات اجازف وآكلها .. بس غالبا تكون العاقبة وخيمة ..
المهم .. قبل جم يوم رحت المستوصف وقلت حق الدكتورة ..
أنا : دكتورة عندي مشكلة من البرتقال والمانجا والرقي من آكلهم تقلب جبدي .
الدكتورة : تحس ان هذي مشكلة ؟ !@#$%^
أنا : إي والله وايد مشكلة .
الدكتورة : خلاص لاتاكلهم .
شنو اسوي فيها هذي .. يعني يكون مقترحه علي شي ..
يالعرزالة .. عرفت ليش المراجعين يحنجون بالردود ويراددون .. وصار ماعندهم ثقة بدكاترة الكويت .. وبعدين .. مو بس انت اللي عندك مشكلة بمعدتك .. ترى حتى أنا J ..

==============
كنت واقف على الجسر اللي بين بيان ومشرف وجنوب السره .. ولا يمي إنفوي اسود .. وقفت ولا يأشرلي اللي يسوق .. نزلت له الدريشة ولا يطلع مصري ، جان يقولي : رايح الشرق .
قلت له : خذ يمين وكمل سيدة توصل شرق ..
قالي : لا .. أنت حضرتك رايح شرق ..
قلت له : لاوالله .
قالي : عاوز حد رايح شرق عشان اخليه يوصل الهندي اللي معاي ..
شنو يعني الطيب شايفنا تاكسي جوال .. ياخي اذا مبتلش بالآدمي ليش تبلش الناس معاك ..

==============
صج اللي قاعد نسمعه عن استاذ جابر ان فيه مشكلة وماراح يفتتحونه ، ولا كل هذا بس يبون يضربون فيه الخرافي ومجموعته .. لأن إذا صج .. فهذا يعني ان الديرة صارت بطيخ .. استلذ رياضي موقادرين يفتتحونه ويتاخر 4 سنين تقريبا .. والله حاله L
==============
أمس رحت كالفن كلاين اللي بالافنيوز .. أنا ابي اعرف النصب والاحتيال شلون صاير .. الجينزات عندهم من 50 إلى 70 دينار تقريبا .. دشيت النت وشفت الاسعار .. الجينزات من 10 إلى 20 دينار .. يعني هل كيف تبوقونا ؟
طبعا بأمريكا هم جذي اسعارهم من 10 – 20 دينار .. وبعدين انطر جاشنمال لما يسوي تنزيلات عادي يبيعهم لك ب 20 ..
الله يخليك نبي حل حق هالناس اللي قاعد تبوقنا ..
=============
يقولون والعهدة على الراوي .. ومحتاجين ناس قانونيين فاهمين بالموضوع .. صج ان المطعم اللي يحط لك بالفاتورة قيمة السيرفس هذي مخالفة للقانون الكويتي ..
تكفة نحتاج حق هالمعلومة عشان نعرف نتعامل مع المطاعم ..
=============
من سنة 95 وأنا بكل صيف لازم سفرة على الاقل .. السنة بمااني موظف يديد .. يعني ماكو اجازة .. يعني راح اضطر انثبر بالديرة طول موسم الحر .. واللي ينرفز وايد ان الناس كلها بتسافر .. يعني على نص ثمانية كل يوم رايح المطار تودع واحد ، وهو يكون حده مستانس وأنت تطلع تشوف الحر.. ومع التفتيش والتنقيب جان تطلع اجازة الاسراء والمعراج .. فقلت هذي مانطوفها .. حجزت حق دبي .. وبأسكن بكراون بلازا اللي بالفيستيفال سيتي ..
اهم المشاريع .. قعدة بمينا السلام ، سكي دبي ، وايلد وادي ، وبخاطري أسوي سكاي دايفنج ..
اللي عنده اقتراحات لايبخل علينا ..
وترى سيارة ومأجرين J
=============
هذي دردشة صغيرة قبل السفرة .. وإن شاء الله بعد ماأرد من تغيير الجو نمتعكم بموضوع دسم ..

رفقا بالقوارير

الدين نزل رحمة للعالمين وحث الناس على السعي والعمل .. كما انه نزل للعدل بين الجميع وليس من اجل ان يقع الظلم على فئة دون اخرى .. ولاشك ان المرأة هي الام والأخت والزوجة .. كما انها نصف المجتمع .. وهي جزء من الانسانية التي نزل الشرع ليرفع الظلم عنها  ..وهذا يعني انها يجب ان تخدم في أغلب مراكز العمل في الدولة .. ولكن تستغرب جدا ان هناك ناس تقول ان المرأة للبيت فقط ويجب ان تبقى تربي الابناء وتعلمهم .. وكل هذا يقال باسم الدين ولاشيء سواه .

ولو نظرنا الى الدين وكيف كان يعامل النساء لاستغربنا فعلا من هذه المعاملة التي تقع عليها في هذه الايام .. فالمرأة في عصر الاسلام الاول كانت تشارك في المعارك والغزوات ، وتعلم الصحابة الحديث والدين ، وكانت تمشي في الاسواق كمسؤولة للحسبة ، كما انها كانت تشارك في الدروس التي تقام في المساجد وتكتب وتتعلم ، الى جانب تربيتها لجيل صالح مصلح ..

قال الرسول صلى الله عليه وسلم : استوصوا بالنساء خيرا ..ماحدث ويحدث الان بالنسبة للنساء في المجتمعات العربية الاسلامية بعيد كل البعد عن وصية الرسول صلى الله عليه وسلم .. فقد منعت من التعليم بحجة الاسلام ، كما انها منعت من ان تتولى اقل المسؤوليات كذلك باسم الاسلام ، وفي بعض المناطق منعت من الخروج من غير محرم وبالتاكيد منعها من قيادة السيارة .. 

استمتعت بحضور أحد لقاءات حدس في عيون الغير وسمعت ملاحظة من الاستاذه عروب الرفاعي عندما قالت ان الحركة لم تعط المجال الكافي للعنصر النسائي ومحتاجين يعطون اكثر وقالت ملاحظة هي التي جعلتني افكر بهذا الموضوع .. هل يعقل ان وزارة الاوقاف وهي المرجع الديني في الكويت لايوجد فيه موظفات الا في قسم واحد وهو قسم الواعظات .. والمشكلة الكبرى هي في أم المؤسسات المالية الاسلامية بيت التمويل الكويتي ( بيتك ) حيث ان اقصى مرتبة ممكن ان تصل لها موظفة هي مساعد مدير فرع .. هذا غير شركة أعيان التي لايوجد فيها  أي موظفة .. وهذا كله يعتبر ظلم وتفرقه وقت على النساء باسم الدين مما يحبطهن ويقلل من عزمهن ..

بينما نرى ان السيدة مها الغنيم رئيسة دار الاستثمار العالمي – قلوبل -  هي أقوى شخصية نسائية عربية ، يعني ان النساء الكويتيات عندهن القدرة والامكانيات على التقدم والأبداع .. ولكن في حال أعطي لهم جزء صغير جدا من المجال .. 

طيب وماهو السبب ؟

آنا اعتقد ان المشكلة الاساسية هي في الصاق العادات والتقاليد بالدين .. وهذه هي اكبر مشكلة في منطقة الجزيرة العربية والسبب يعود الى تاثير الدعوة السلفية الوهابية في المنطقة وتشددهم الواضح في هذه النقطه ..فتجد الكثير من العادات تعتبر جزء من الدين الان وذلك كله بسبب هذا التشدد ..

والحل ؟

اعتقد ان الحل هو في زيادة فعالية وحماس ومطالبات النساء .. كما اننا انحتاج ان ننوه الناس باهمية الدور الئي قد تلعبه النساء في الرقي بالمجتمع ان اعطيت مجال من الحرية .. ولاننسى السلاح الذي له تاثير السحر وهو الفتوى .. فنطلب فتوى من المشايخ المعتدلين بان هذه الامور من العادات وليست من الدين وننشرها بين الناس .. 

==================

بلاني زماني ..

الانسان بطبعه اجتماعي ولايحب الجلوس لوحده ولذلك تجد الشخص يسمى مريض اذا كان يحب الوحده .. او مايسمى بمرضى التوحد ..

والصداقه شيء عظيم ومن اهم الحاجات الانسانيه التي يسعى كل شخص الى اشباعها .. لذلك فهي نعمة من نعم الله سبحانه علينا ..

من فترة ليست قصير .. اصبحت افكر كثيرا بالصداقة ومايسمى اخو الدنيا .. وسولفت فيها مع شخص قريب مني ودار بينا حوار مسجاتي ..

انا : ليش الانسان لازم يكون عنده شخص قريب منه ؟

هو :عشان يكون سنده في الحزن والفرح .

أنا : بس مودايما جذي ، والحين هذولي تقريبا خلصوا .

هو : كلامك موصحيح هذا اساس الموضوع بالاضافه للطبيعه البشريه 

انا :طال عمرك هم مودايما يكونون عون لك .. مرات يكونون عبء ثقيل عليك .. تجامل وتضحي عالفاضي ..

هو : معناتها هذا مو قريب منك 

انا : وشنو يعني قريب منك ، انا ابي اعرف معناها عدل ؟ وبعدين جم اخو دنيا مر عليك ؟ 

هو : هذا يبيله نقاش .. بس واجد مرو 

انا :اذا كانوا وايد فمو اخو دنيا .. هذا يصير مثل القلم او الساعه تكشخ فيه شوي وبعد مايصير قديم تقطه وتاخذ غيره .. وبعدين وين اللي كان اخو دنياك قبل ١٠ سنين ، وشنو تذكر منه ؟

هو : سؤال يحير صراحه .

أنا : يعني وجهة نظري صحيحة ؟

هو : نوعا ما 

طبعا راح تقولون شفيه هذا قاعد يخربط .. اقولكم قبل اي تعليق مافي شي ينطبق على الكل .. ولكن انا اتكلم عن اللي قاعد يصير من حولي ومن الشغلات اللي شفتها .. واستثني من هذي القاعدة الاشخاص اللي عندهم اخو دنيا من قبل لايدشون الثانوية .. لان غالبا هذولي يكملون ويطولون وايد ..

وقبل ما ابدي بعد في ناس مروا في حياتي وكانوا اخوان دنيا وماراح انسى مواقفي وايامي معاهم .. وهم فعلا كانو يستحقون انهم يكونون اخوان دنيا .. ولعل بعضهم للحين جذي .. ولهم مكانه خاصه في القلب .. بس انا متاكد ان احنا الحين بعدنا عن بعض وايد وفرقتنا الدنيا .. واتمنى ان تردنا من يديد .. 

نبدي .. وأولا :نظريا صح المفروض يطول معاك وايد وتكون فاهمه عدل .. بس هذولي من ينتقلون اي انتقال في حياتهم .. سواء من مرحلة الى آخرى او اندماجهم في عمل يديد .. خلاص ماتصير العلاقة مثل ماكانت قبل يعني على سبيل المثال ..

اثنين ربع في مرحلة الثانوية وعلاقتهم نار حدها .. يتخرجون ويدشون الجامعه كل واحد بكلية .. مايكملون سنه الا وهم بعاد .. وطبيعي البعد يولد الجفا .. 

ونظريا كذلك صعب تحصل واحد بنفس اهتماماتك ونفس تفكيرك وتعتقد انه يستحق يكون اخو دنياك .. لذلك راح يكون في فترة ( شهر عسل ) ممكن تمتد وايد .. بس عقبها كل واحد بيرد حق اهتماماته وشغله .. ومايبي يذوب شخصيته ..

وبعدين قاعد تصير مواقف ومنتشره بين اخوان دنيا على سبيل المثال ، وهذي انا شفتها وموشرط صارت لي :

واحد عنده عزا واحد من اهله تروح وتوقف وتحاول تساعده تلقاه يقولك شفيك ياي ، خلاص امش .. !❊#$٪^

وواحد ثاني يوم عرسك .. يكون مسافر ..

ولا واحد ثاني يوم عرسه تدق عليه قبلها تقوله شنو تبي اساعدك يقولك لا مشكور بس تعال ..

ولا الثاني بديوانيتك الاسبوعية يمرك مره بالشهر .. لا وتكون تسيوره ..

او واحد عنده مشكله ويدري انك تقدر تحلها .. بس يكابر ويقولك لا مافيني شي ..

او يكون عنده شي وايد مونسه .. وتلقاه خاشه عنك ويقولك اياه بعد اسبوع  !❊#$٪^&

شغله ثانية انت فكر فيها بنفسك .. جم اخو دنيا مر عليك .. كنت انت وياه مايقولون اسم واحد فيكم الا والثاني معاه ؟ونفس السؤال اخو دنياك اللي قبل ١٠ سنين شنو تذكر منه واصلا وينه هو ؟

طبعا اسوء شي انك تدري ان علاقتك مع واحد صارت وايد باردة وحتى هو نفس الشيء وتقصون على بعض .. اي هذا أخو دنيا وجدام الناس كلهم تقولون ان احنا حدنا ربع .. وحتى بينكم وبين بعض تحسسون نفسكم بهالشي .. وطبعا كل هذا تسوونه احتراما حق الماضي .. وليس من اجل علاقتكم الحين ..

انزين شنو اللي تبي توصله ؟

اللي ابي اوصل له ان بعد ماشفت وايد مواقف جدامي حق ناس كانوا يفهمون بعض من نظرات .. ويقعدون مع بعض باليوم فوق ال١٠ ساعات .. فجأة مالهم شغل ببعض كلش .. كنت اعتقد ان هذا شي غلط .. ولكن بعد التفكير الطويل اكتشفت ان حال الدنيا جذي .. عشان جذي عندي ان يكون عندك وايد اصدقاء مستمرين معاك احسن من اخو دنيا يتغير كل فترة .. طبعا اكيد الاحسن ان يكون عندك اصدقاء وايد واخو دنيا .. :)

وبالنهاية تبقى وجهة نظر بنيت على وقائع واحداث صارت لي .. قد تكون صحيحه وقد تكون خاطئة ولكني في هذي الايام اعتقد انها صحيحه .. 

==============

زاوية كتاب الاسبوع

رواية من اجمل الروايات للكاتب المبدع جدا عبدالرحمن منيف .. رواية تسحرك بروعة الاسلوب .. تتكلم غالب رواياته عن معاناة مواطن عربي .. 

طبعا لاتسألوني الحبكه شلون صايره .. 

باختصار روعة مابعدها روعة انصحكم بقراءتها ..

مساكين

مسكين بوالعريف .. 

أنا أكثر شي ينرفزني بالدنيا الناس اللي حسبالهم ان مسكوا العلم من جميع اطرافه .. الانسان اللي يسوي نفسه فاهم بكل شي .. وهالاشخاص في منهم نوعيتين .. 

النوعية الاولى : هي الشخصية اللي من تسال أي سؤال تلقاه على طول يجاوبك ويقول لك أي انا اعرفه وهو جذي وجذي .. وتلقاه ما يدري وين الله قاطه ولا يعرف ولا شي من هالكلام كله .. مثال عليه وهذا تحصلونه وايد وبكل ديوانية تقريبا ، سولف عن البورصه تلقاه هو اللي يقولك عن كل الاسهم وهذا السهم مو زين ويحسسك ان هو مدير محافظ ، آخر شي يطلع حتى ألف بالسوق ماعنده ، ولا تقوله ايهو احسن لاند كروزر ولا باترول ويروح ويفصل لك ويشرح ، فجأة ولا كلامه خرابيط  ..وهالناس اذا عرفتهم عدل تستانس عليهم اذا سألتهم بالديوانية .. لانه يمتع الحضور وتدري ان كلامه كله خرابيط ..

النوعية الثانيه واللي هي اخطر واشد بكثير ، اللي هي ماتسولف أي سالفه الا وهو الشخص اللي يعرف كل هالسوالف قبلك ، والناس كلهم مستشيرينه قبل لايقولون لك أي شي .. نوضح اكثر بمثال : انا وواحد من الشباب بندش مباراة السعودية والامارات بكاس الخليج اللي طاف .. واحنا بالطريج بالتاكسي سالني اللي معاي منو يلعب زين بالسعودية لاني مااعرف غير الشلهوب وياسر القحطاني جان اقوله اللاعبين ، شوي ولا المعلق يقول مالك معاذ خطير وسريع جدا ، عقب دقيقتين جان يقولي معروف مالك معاذ اسرع لاعب بالدوره .. ايا أخو الذين توك ماتعرف احد ، تسمع من المعلق وتقولي .. 

ولايقولك فلان الفلاني واحد صاحب منصب كنا بنستضيفه بديوانيتنا جان يقول حق الشباب تبون ادبسه باجتماع واخليه يسحب عليهم وماايي الديوانيه .. هدي شوي .. 

صج شي ينرفز .. والمشكله ان هالشي بعدين يصير مرض ويخليك تتعامل مع كل الناس بهالطريقه المليقه وتوصل الى ربعك القراب حيل منك واهلك .. 

شلون تتعامل مع هالناس : انا اعتقد ان احسن طريقة تتعامل فيها مع هالناس هي ان تكون ذاكرتك قوية وتذكره بكلام كان قايله من قبل عكس هالكلام ، وياكثر الكلام المتضارب اللي يقولونه هالناس .. 

طريقة ثانية هي انك تطيح تدقر فيه .

================

مسكين المريض ..

نوعية ثانيه مسكينه .. وهي النوعية اللي بس تقعد معاها تبدي تتكلم عن الناس من وراها .. ومافي احد بالدنيا عاجبه ، يعني حس على غفله ان هو الوحيد بالعالم اللي يستحق ان يعيش بهالدنيا .. 

على سبيل المثال يقعد معاي ويتكلم بسين من الناس وهذا موزين وفيه جذي وجذي وشخصيته ضعيفه ، بعد جم يوم يروح حق سين نفسه ويقوله ترى هذا مو زين وفيه جذي وجذي .. المشكله ان احنا الاثنين نكون ربع حيل يعني اشكره راح يسألني صاحبي يقولي شنو بينك وبينه وراح ندري عن كل شي ..

المشكلة ان هذا الشخص بعدين خلاص مايعرف يقعد بدون لايتكلم عن احد وبعدين راح يخسر كل الناس ، لانه راح يحسسهم ان هو الوحيد اللي مافيه عيوب.. وطبعا عيوبه واصله الى أفاه .. وصج مايبين بعينه احد  .

شلون تتعامل مع هالنوعيات .. 

طبعا اول مايبدي يتكلم تقوله لوسمحت انا ماأبي اسمع كلام عن احد .. إما تسولف عدل او انك تكرمنا بسكوتك ..

الطريقة الثانية .. هي انك تقوله انت مو قاعد مع فلان ومسولف له  عني واني مو زين .. انت شنو بس تبي تتكلم بالبشر .. 

============

مسكين ماكي ..

شنو لذيذ هالمطعم .. وصج فرق بينه وبين أي مطعم ياباني ثاني .. صج تحس الكوالتي هني وايد تفرق ..  بس المشكله انك تطلع من المطعم دافع وايد 

اشرايكم انتوا فيه ؟ وشنو احلى الاطباق ؟ 

طبعا غير عيسى ، والربيان المقصص والبيف تيرياكي ، والشيبس ، وسلطة السلمون بس من غير سلمون  

============

وأخيرا .. مسكين نادال ليش متواضع وايد ، أنا بصراحه كان دايما حسبالي ان هو وايد شايف نفسه .. بس عقب ماسحق فيدرر في رولان غاروس طلع تكلم كلام في قمة التواضع .. وفي ويمبلدون يوم فاز عليه بعد كان في ارقى درجات التواضع .. يوم قال : 

He still the # 1

He still the best 

He still five times champions here .

وطبعا ركزوا على حرف الخاء .. خي يعني he 

منو آذكى ؟!

الله سبحانه وتعالى ميز البشر بميزة الحس والادراك والتفكير .. والانسان بخلقه مايفكر بالشي الا بعد ما يدركه .. يعني في اشياء وايد في المعموره موجوده بس احنا للحين مانقدر نفكر فيها ، لان احنا مو مدركينها .. مثل ما ان في وايد اشياء كانوا اللي قبلنا مايفكرون فيها لانهم مو مدركينها .. 

 على سبيل المثال .. الناس قبل كانت ماتفكر انها تصعد الى الفضاء .. لانها ماادركت بعد ان الفضاء ممكن يوصلون له .. كذلك احنا مانقدر نفكر بشكل الجنه او الحياة بعد الممات ، لان احنا بعدنا ما ادركنا اعادة الروح ..

بعد هذه المقدمه يكون لزاما علينا ان نسأل سؤال .. هل احنا كاشخاص متاخرين ( زمنيا ) أذكى من الاشخاص المتقدمين ( زمنيا ) ؟ 

قبل ان نبدأ في الاجابه يجب علينا ان نعرف معنى الذكاء .. اختلف الكثير من العلماء حول مفهوم الذكاء ولذلك اخترنا اكثر التعريفات شيوعا .. 

تعريف العالم بينيه:هو قدرة الفرد على الفهم والابتكار والتوجيه الهادف للسلوك والنقد الذاتي .
العالم ترمان: الذكاء هو القدرة على التفكر المجرد.العالم كالفن: هو القدرة على التعلم او القدرة على التحصيل وهذا التعريف اكثر شيوعا واكثر استخدام.

وبناءا على هذه التعريفات نستنتج ان الذكاء امر آخر غير الادراك لذلك فهو لايعتمد على ادراكك ولا على الفتره الزمنية التي تعيش بها ولا على تطور العلم في وقتك وانما يعتمد على قدرتك على التفكير .

ولكن هل يعقل ان كل هذه الثورة المعلوماتيه وكل هذا التقدم لا يصب في مصلحتنا ؟

باعتقادي ان كل هذا التقدم يصب في مصلحتنا ولكن ليس في جانب الذكاء .. وانما في سرعة التعلم ، فعلى سبيل المثال في الأزمنه السابقه كان الشخص يسير مسيرة شهر من اجل الحصول على حديث واحد أو راي في مسأله أو أديسون على سبيل المثال جرب اكثر من 260 تجربه من اجل الوصول الى المصباح .. بينما نحن في زمننا من اجل الحصول على حديث يكفيك الدخول الى احد المواقع الاسلاميه والحصول على الحديث بسهوله ويسر ، أما عن اديسون فاعتقد ان وضع نظام للتجربه على جهاز الكمبيوتر يسهل كثيرا من

 المهمة .. 

فلماذا إذن يصر الناس على ان الائمة الاربعة على سبيل المثال في الفقه لايمكن ان يقارعهم احد في وقتنا .. أو نيوتن مثلا يصعب جدا ان يصبح شخص مثله .. اعتقد انه من باب ان لا ننسى ان ننسب الفضل لاهله ان نذكر انهم هم اول من استخرج هذا العلم وبالطرق الشاقه .. ولكن مع التسهيل والتيسير أصبح بامكاننا ان نفوقهم بدرجات لو اجتهدنا حق الاجتهاد .. وهذا هو بيت القصيد ..

المحصله النهائية .. ان الذكاء ليس مرتبط بالفتره الزمنيه ولكن التعلم هو الذي يفرق مع تقدم الزمان ..

هذا الكلام ليس كلام علمي مثبت وانما مجموعة افكار كنت افكر فيها مع بعض الافكار الخارجيه .. 

=============

على طاري الذكاء .. منو تتعقد من وجهة نظرك اذكى من مر على البشريه ؟

بالنسبه لي كنت اللي اعرفه واللي يتكلمون عنه الناس ان اذكى شخص هو آينشتاين وهو الشخص اللي حط نظريات وأبدع  .. وبعد فترة قرأت في احد المواقع ان اذكى أذكياء العالم هو ليوناردو دافنشي وبديت احس ان فعلا هو الشخص الاذكى خصوصا بعد ماقريت رواية دافنشي كود وأعجبت بدرجة ذكاءه ( واللي يحصل لي مذكراته اكون له مشكور ) .. وبعد نقاش مع واحد من الشباب ، قالي انا اعتقد ان بيتهوفين هو اذكى أذكياء العالم ، لان الشي اللي سواه مايقدر يسووه انسان عادي ..

برأيكم ، منو اذكى أذكياء العالم ؟ 

=============

نبدأ بزاويه ان شاء الله تكون اسبوعيه .. أو على حسب الاستطاعه .. وهي زاوية كتاب اعجبني ..

مؤلف هذا الكتاب بروفيسور امريكي في الرياضيات ..كان مسيحي في بداية حياته ولمدة 19 سنه ، ثم أصبح ملحد 10 سنين ، ثم اسلم بعدها .. الكاتب يتميز بأسلوبه الرائع 

=============

رواية قصيرة من اجمل ماقرأت ادعوكم للاستمتاع بها فهي فعلا جميله جدا .. 

http://awaael.net/forum/showthread.php?t=2223

قهر

حدي متضايق ومتنرفز ومنبطه جبدي بعد ..

أول شي .. مايصير كل الكويتين وباختلاف تخصصاتهم المهنية قاعد يتحلطمون على الكويت وعلى القوانين المحطوطه فيها ..
1- أنا اشتغل بشركة عقار وقانون العقار السكني اللي يستحق عليه اعضاء مجلس الامه براءة اختراع حده منرفز كل الناس اللي تشتغل بمجال العقار ..
2- قاعد اسولف مع معماري توه بادي حياته العمليه بعد التخرج .. وحده قاعد يتحلطم على قوانين البناء في الكويت وشلون هي متخلفه.. لا والأقوى ، يقول ان أي تصميم حق مشروع بالكويت لازم يكون عن طريق مكتب كويتي ، يعني حتى لو شركة عالمية سوت التصميم لازم تقدم باسم مكتب كويتي .. والمكتب الكويتي ياخذ التصميم العالمي ويألف فيه مثل مايبي ويصير مليق وماينبلع ..
3- أخوي مبتعث لدراسة الماجستير والدكتوراه إلى أمريكا عن طريق جامعة الكويت ، وقاعد يتكلم عن شروط القبول في البعثه وشلون هي مليقه وتنرفز ، يقول كل ماأسولف مع واحد بأمريكا عن الشروط يضحك علي ..
طبعا هذا غير الوضع الرياضي اللي الله يستر عليه ، وجماعة البورصه بروحهم تحلطمهم واصل إلى المريخ ، وروح اسحب على كل التخصصات .. طبعا هذا كله بصوب ، والمرور والزحمة والشوارع بصوب ثاني ..
لا وحتى الجندول بالمدينه الترفيهيه عليه صيانه من سنتين L
ولما شفت الفيديو كليب مال نشيدة العفاسي يابلادي ، تنرفزت اكثر .. ياخي قاعد تتكلم عن الكويت ليش تحط صور خياليه .. حط لنا صور حقيقية من الكويت .. قهر

ألحين انا صج صج قاعد افكر إني اشوف لي وظيفه برا الكويت واهاجر واهج من هالديره اللي مافيها واحد راضي عن الوضع ..

وصدق زميلنا المدون لما قال .. حسافتج ياكويت ..

=============

ليش الشعب الكويتي شعب مايحترم المواعيد .. لا والمشكله ان اللي يحترم المواعيد هو اللي يتحمل الذنب مو الشخص المتأخر ..
مواعد اثنين من ربعي بنتعشى .. حجزت لهم طاوله الساعه 8:30 وتواعدنا ان بنمر بعض وبنروح .. دقيت عليهم 8 ولا واحد يقولي انا باييكم المطعم والثاني قالي انا الحين بالديره 10 دقايق واطلع .. ركبت سيارتي ووصلت المطعم 8:31 ادق عليهم ولا الاول مايرد .. والثاني قالي كاني ألحين بطلع وأييك على طول .. شفتهم جذي جان انزل معاي كتابي وأقعد اقرا .. أول واحد فيهم وصل 9:15 أقوله ليش تاخرت ولا يقولي يوم ييت بمشي ولا واحد يمسكني يبي يفضفض .. قلت له انزين دق علي قولي بتأخر جان يقولي استحيت ادق عليك جدامه .. !!! صج هذي ماأدري وين اصرفها ..
طبعا المشكله ان الله بلاني بربع ولا واحد فيهم عنده احترام حق المواعيد والوقت إلا ماندر ..

=============

قاعد اسولف مع واحد أبو عيال عمره 50 ومع السوالف جان نوصل حق الزواج .. ودار بينا هالحوار ..
أنا : اشرايك تنصحني اتزوج بهالعمر ؟
هو : اذا انت قادر واتحس انك ماتمسك عمرك ، أي تزوج !!!!!
أنا : إنزين شنو المهارات اللي احتاجها حق الزواج ؟
هو : ماتحتاج شي .. بس تداعبها ربع ساعه قبل الجماع !!!!!!@#$%^&&*

أول ماقالي جذي .. جان اقول - وعفوا على هالكلمه – شنو هالحيوان .. صج شي ينرفز .. هذا وهو بعمر ابوي وعنده عيال ويعامل المرأه جنها حيوان بس حق الفراش .. صج ناس ماتستحي ..

==============
في موضوع سابق في مدونة العزيز العرزاله كتب عن الأماكن السياحيه في البلد .. وكنت وعدته اني بروح المركز العلمي وبييب اوراق الاماكن السياحيه بالكويت .. بس صج شي ينرفز .. ماكو إلا حديقة الحيوان اللي تييب الماحي ، ومتاحف الكويت اللي هي متحف طارق ومتحف الفن الحديث والمتحف العلمي وبيت القرين ، وحاطين لك كرت فيه المعارض اللي بيسوونها بالكويت خلال السنه .. شي ينرفز بعد

==============
نرفزات سريعه ..

صج تتنرفز لما تكون في مكان وتشوف في أخطاء جدامك وتحاول تصلحها بس ماعندك الصلاحيه ..
صج تتنرفز لما تكون مع ناس حسبالك انهم كبار بس مع الاسف يطلعون وايد يهال ويتهاوشون على شغلات تافهه ، أو تلقاهم مايسلمون على بعض من 20 سنه ..
صج تتنرفز لما تكون مقدر واحد ومعطيه كل اللي يبيه وبعدين تطلب منه شي بسيط ومايسويلك اياه ..
صج تتنرفز لما واحد طموح وقريب منك حيل يقولك أنا قررت اني اعيش حياة انسان عادي اتخرج ، اتوظف ، أموت ..

وصج تتنرفز لماتكتب موضوع كامل .. وبعدين تسوي التنسيق له ويعلق عليك الكمبيوتر وينمسح كل شي .. !@#$%^&*

============

أنا كنت مواعدكم بموضوع يديد ودسم بنهاية الاسبوع .. بس من كثر ماني متنرفز ماقدرت اكتبه .. عموما فكرة الموضوع موجوده وان شاء الله بالقريب العاجل انزله ..

تحياتي