شخابيط دوار الشيراتون

اجتمع مجموعة من قساوسة كنيسة الفاتيكان من اجل اصلاح الوضع الكنسي السيء واتفقوا على ان يخلعوا البابا الموجود ويضعوا واحد منهم ليحل محله ويعدل هذه الازمه .. وبعد ان اتفقوا على اختيار شخص منهم ليكون البابا القادم قالوا له لاتكن من الناس الذي يطالبون بالتعديل وعند وصولك ( للكرسي ) يتم اغراءك وتستمر على نفس الوضع ..وبعد محاولات للتغيير واسقاط البابا كانت عن طريق اجتماعات ولقاءات تعقد مع جميع القساوسة من اجل اقناعهم باهمية التغيير وسوء الوضع الحالي وانه سيعمل من اجل وضع افضل نجحوا في تحقيق هدفهم ونصبوا صاحبهم الذي اتفقوا عليه .. وفور جلوسه على الكرسي جاءه اصدقائه الذين اتفقوا معه على التغيير وطلبوا منه البدء بهذه التغييرات فقال لهم انظروا الى روما من النافذه انها تبدو جميلة وليست بحاجة الى التغيير .. فرد عليه احدهم بكلمة اصبحت مثلا : لاتنظروا الى روما من النافذه ولكن انظروا الى روما من حيث اتفقنا عليه . 

هذي القصة قد تنطبق على وايد مواقف ووايد اشخاص .. واقرب هذه المواقف هي حال نواب الامه .. فكنا نروح حق ندواتهم في المقرات وكنا نسمع التغيير والاصلاح والتنمية .. وكلنا استبشرنا خير بهالكلام وقلنا لازم نصوت لهم عشان التنمية .. بس عقب ماوصلوا حق الكرسي – موكلهم – شافوا روما من النافذه ومع الاسف ..والغريب بالموضوع ان هالمجلس كلش ماكان فيه شهر عسل .. يعني المشاكل واللوية من اول شي طلعت .. 

_________________________________________

كنت قاعد اسولف من فترة قريبة جدا مع مهندس ومحامي – الاثنين اكبر مني باكثر من عقد – ووكيل نيابة .. وكلهم اكثر مني ثقافة وبشكل كبير .. كنا قاعد نسولف عن الاخلاق ودورها في الوظيفية .. فمثلا دور القيم والاخلاق في الاقتصاد ولا المحاماة ولا في الهندسة .. وعن الكتب اللي تتكلم عن هالمواضيع .. فكانت وجهة نظري ان هالمواضيع كلام انشائي ليس إلا .. يعني لما تقرأ واحد من هالكتب راح تقول الله كلام وايد حلو بس تعال طبقه على ارض الواقع راح تندقر وتحس انه كلام وايد مثالي ولايمكن تطبيقه .. فرد علي المحامي رد وايد عجبني وكان كالتالي : احنا مو هذا الكلام اللي احنا نتكلم عنه .. احنا نتكلم عن ان كل موظف - المحامي على سبيل المثال – لازم يفكر ان هو هدفه رفع الظلم والدفاع عن الحق وان هو شخص مسؤول عن هذي الامور .. راح تتغير نفسيته وانتاجية في وظيفته وراح يبدي يحس ان هو جزء كبير في ارساء العدل في البلد .. وان هو لبنة مهمة جدا .. بالتالي ماراح يتساهل في وظيفته ابدا .. 

اللي ابي اوصله ان عندنا علوم انشائية حلوة .. بس المشكلة في كيفية تطبيقها .. ولعلي اشرحها اكثر في بوست قادم .. فالامثلة عليها كثيرة

________________________________________

لعبة ميتال قير .. وحده من اكثر الالعاب شعبية ( بالنسبة حق اللي يلعبون سوني ) .. اللعبه شيقة ومميزه ( مالعبتها – بس كنت اشوف اللي يلعبونها ) وفكرتها وايد حلوة .. هذا طبعا غير الرسم الموطبيعي .. واللعبة كانت مسويه ضجه خيالية قبل ماتنزل ... ومن قبل 4 اشهر والناس تسولف عنها .. كل هذا اوكي .. بس ان موظفين في شركة خاصة ياخذون اجازه يومين عشان يلعبون هاللعبة .. وايد عيب .. ولا الثاني يقول انا طلبتها pre order .. وحده العادية ووحدة limited edition يقول العادية بخلصها وبعدين ببيعها مستعملة .. وال limited edition بكمل فيها .. والله ناس فاضية ورب الكعبة .. هذا طبعا غير ان مصورين اول 4 شروها من الكويت ومنزلين صورهم . وهي نازله هني قبل امريكا .. صج صج شعب يبي تنمية ..

________________________________________________

الكويتيين حده فنانين بالقز .. صار في مشوار قز حلو الحين .. تبدي بالحب من عند الضاحية الى الشامية ..تدخل داخل الشامية وتلف لفة في مواقف الجمعية .. وبعدها تطلع تكمل عالحب الى البحر .. وتروح تتعشى .. يمكن هذا المشوار قديم ومعروف .. بس على الاقل بالنسبة لي هو يديد .. وتوني اعرف ليش مواقف جمعية الشامية كل زحمة ..

الله يكافينا ويكافيكم شر القز والفضاوة .. وشر ميتال قير