في مواقف تمر عليك بالحياة ماتدري شلون تتصرف فيها .. بعض يكون غريب ، بعضها يقهر وينرفز ، بعضها يموت من الضحك ..
هذي مجموعة مواقف ابي اعرف اذا صارت حق اي واحد فيكم يقولي شنو رح يسوي ..
تذكرون بامتحان الانجليزي بالمتوسط والثانوي لما كان في سؤال ماذا تفعل في المواقف التالية .. الزين فيه ان اي شي تكتبه يطلع صح .. لان كيفي انا راح اتصرف جذي .. :)
ابي اجاباتكم على هالمواقف بنفس الطريقة ..
1- يدق عليك التلفون فجأة من واحد علاقتك فيه عادية .. يقولك جذي فجأة وبدون اي مقدمات .. تلعب تكملة عدد بعد نص ساعة .!!
2- شخص عزيز عليك ، يغلط وبعدين بدال لايعتذر ايي ويبرر غلطته بكذبه .. والمشكلة انك تدري عن الغلط ..!@#$%
3- أنت بكامل قواك العقلية تروح الممشى تبي تسوي رياضة وتصفط سيارتك وتقعد تتمشى ، وعقب ماتطوف سيارتك بمسافة كيلوين ونص يلف عليك الانكل وماتقدر تمشي .. وتبي ترد سيارتك شلون .!!
4-واحد أكبر منك بمراحل ويكون مسؤول عنك في عمل .. وتختلف معاه في نقاط .. وبعدين يمشي ويسولف مع كل الناس عنك وفلان تركته وفعلته وفيه ومافيه .. ماباقي الا يسولف مع خدامتنا .. شنو ممكن تسوي له !!
أتمنى اسمع اراءكم حول هذا الموضوع ..
16 التعليقات:
1- يدق عليك التلفون فجأة من واحد علاقتك فيه عادية .. يقولك جذي فجأة وبدون اي مقدمات .. تلعب تكملة عدد بعد نص ساعة .!!
=-=-=-=-=-=-=-=-=-=-=-=-=
اقول له: شوف لك غيري ( و بس)
2- شخص عزيز عليك ، يغلط وبعدين بدال لايعتذر ايي ويبرر غلطته بكذبه .. والمشكلة انك تدري عن الغلط ..!@#$%
=-=-=-=-=-=-=-=-=-=-=-=
هالموقف يصير وايد، و الناس قامت ما تستحي من الجذب، اللي يعتذر و هو يكابر بالجذب فثق ان هالشخص مو ياي يعتذر، هذا في بطنه ريح زياده و ياي يطلعه.
شخص مثل هذا احط عليه أكس و اكتفي بالسلام عليه من بعيد لي بعيد و بس.
3- أنت بكامل قواك العقلية تروح الممشى تبي تسوي رياضة وتصفط سيارتك وتقعد تتمشى ، وعقب ماتطوف سيارتك بمسافة كيلوين ونص يلف عليك الانكل وماتقدر تمشي .. وتبي ترد سيارتك شلون .!!
=---=-=-=------=---=-=----=-=---=
أعرج لي السيارة
4-واحد أكبر منك بمراحل ويكون مسؤول عنك في عمل .. وتختلف معاه في نقاط .. وبعدين يمشي ويسولف مع كل الناس عنك وفلان تركته وفعلته وفيه ومافيه .. ماباقي الا يسولف مع خدامتنا .. شنو ممكن تسوي له !!
أتمنى اسمع اراءكم حول هذا الموضوع ..
=-=-=---=-=-=-----=-=-=-=-=---=
ما اكلمه
انما سيده
اشتكيه للمدير اللي فوقه
الموضوع كاد أن يختفي من ذاكرتي تماما :)..
أذكر إن الأبلة إذا ما حصلت الإجابة اللي في بالها ما تحسبها صح ..
عالعموم إجاباتي كالتالي:
1- يدق عليك التلفون فجأة من واحد علاقتك فيه عادية .. يقولك جذي فجأة وبدون اي مقدمات .. تلعب تكملة عدد بعد نص ساعة .!!
إذا الموقف يحتاج لي وله قيمة أضيفها لحياتي.. فأروح ليش لأ..
أما إذا كان القصد سوالف لعب ويقزرونها علي فأعتذر لأن يظل الإنسان يبي يحس بقيمته ..:)
***
2- شخص عزيز عليك ، يغلط وبعدين بدال لايعتذر ايي ويبرر غلطته بكذبه .. والمشكلة انك تدري عن الغلط ..!
كلش ولا الجذب.. إذا أساس العلاقة بدت جذي فأفضل إن ما يكون إحتكاكي قوي بهالإنسانة.. أمشي السالفة معاها لكن مع وضع 1000 خط أحمر تحتها..
***
3- أنت بكامل قواك العقلية تروح الممشى تبي تسوي رياضة وتصفط سيارتك وتقعد تتمشى ، وعقب ماتطوف سيارتك بمسافة كيلوين ونص يلف عليك الانكل وماتقدر تمشي .. وتبي ترد سيارتك شلون .!!
أقعد فترة أتأمل حالي .. ويمكن تييني البجوة.. وعقبها أدق تلفون على أحد إيي يساعدني..
***
4-واحد أكبر منك بمراحل ويكون مسؤول عنك في عمل .. وتختلف معاه في نقاط .. وبعدين يمشي ويسولف مع كل الناس عنك وفلان تركته وفعلته وفيه ومافيه .. ماباقي الا يسولف مع خدامتنا .. شنو ممكن تسوي له !!
ما أسويله شي ..
"إذا ركلك الناس من الخلف فاعلم أنك في المقدمة" .. أنا من النوع المسالم.. وما أحب أخوض في خلافات مع ناس ما تستاهل أضيع وقتي معاها.. ودام إني واثقة من نفسي فأكيد راح تتضح صورتي عند الناس بخلاف الكلام اللي قاعد ينقال عني :)
موضوع ممتع بصراحة .. تشكر عليه.. خصوصا إنه يا بعد إسبوع طويل قضيته حافل بالأحداث..
الاول
مشكور ذكرتني بس أنا منشغل اشوي
يعني ما لبيت الدعوة الغريبة بس هم ما جرحت الشخص
الثاني
ما احب الكبة مهما كانت ما تبرر اعصب ازيادة أو أحقر و اطوف
الثالث
بييييييييييييييه اي عصر عايش موبايل ألو تاعالوا اخذوني
الرابع
تروح تكلمة او اطوف السالفة حدها يومين و يطلع موضوع يديد للكلام
1) اقوله شوف لك غيري ... وان عزم اقوله ان شاء الله ... وخل ينطر
2) حصلت وايد ... ابتسم فقط
3) اتصل على صديق ...كيلوين ونصف مو غشمرة
4) ارد عليه بشغلي ...يعني بعملي اخليه -او غيره - يغير الفكرة
1- أول شي أقووله مشغول، ماعندي وقت. بس أقوله هاا يمكن أخلص شغلي!
واسأله جني مادري، اي ملعب؟ إذا شفت الملعب يسوى وما يتطوف. قلتله والله شكلها الشغلة مو مطولة. نص اعة وإهي خالصة. إذا شفت الملعب سلامات، أقووله لااااااا شكلها ماتخلص إلا باجر
2- أصيده من أفاه، وأبين له إنك جذاب. وأبين له لو معتذر بدون جذب، أبرك
3- أشوف أقرب قاري "برد" ويعطيني ثلج، أريحها بو 10 دقايق وأكمل مشيتي
وإذا الإنجري طلع سوو (سيفير) أقووله يردفني لي سيارتي
4- اكلمه بكل احترام وابين له اني متضايق من فعلته، ماكو فايدة. الشكوى لله
خليتني افكر وآنا مسطل
:)
بالنسبة للعب الكرة .. اذا تبي رقمي حاضر
:)))
24\7
_______________
الثانية احرجه بالرد عشان يتحسف على اللي سواه :)
مثل يااه شهالصدفة او الفرصة العجيبة اللي خلتنا نسمع صوتك ومن هالحجي :)
_______________
انت بنفسك تقول بكامل قواك العقلية .. يعني ماراح يلف الأنكل عليك .. راح يفتر راسك وخشمك من العطور والأشكال اللي تشوفها بالممشى بس فبالتالي راح يحوشك الأنكل بالمخيخ الأعور مالك
:))
_______________
الأخيرة .. دعوة المظلوم مابينها وبين الله سبحانه حجاب
:)
هع
1- العب عااااااادي اذا كان الجو حلو بس اذا حر اقوله داق قبلها بنص ساعة استريح
2- صارت فيني امس من واحد عزيز علي وانحرجت ما ادري ابط جذبته والا اطوفها له ففضلت اني اطوفها بمزااااجي
3- هم صارت فيني سنة 2004 يمكن وكنت اركض وييت على ويهي مع لفة الانكل بالممشي وبصراحة تدبست ما ادري شسوي
4- نفس راي بوضرار
بتوصية من صاحب السمو الامير و
منذ السابعة صباحا بذل الشيخ ناصر المحمد جهدا جبارا اسفر عن الافراج عن رجل الأعمال سعود عبدالعزيز البابطين الذى كان معرضا للسجن في ايران جراء سوء فهم...حيث ساهم تدخل الشيخ ناصر على أعلى المستويات بتوضيحه وإنهاء الوضع على خير..ومن المفترض ان يكون البابطين في طريق العودة الأن
لووووووووووووووووول ..
صراحه أول موقف انا مالي بالكره نهائيا ;q
ثاني موقف سهالات لمح له إن صايد جذبته بنغزه وخل الأمور تعدي :)
ثالث موقف مادري شنو الأنكل بس اذا يعني لازم تروح الطبيب بسبته فإختصر الطريج ودق عالإسعاف ;q
رابع شغله ونااااسه أروح أشتكي ونتحول أثنيناتنا تحقيق D:
خامسا الأخ صاحب الكومنت الي فوق كومنتي (نار) شسالفته مو جنه مضيع :\
1
اقوله منو معاي
يقول فلان
اقوله اها
طوط طوط طوط
2
انا اكره ما عندي اللي يبرر حق غلطه
فا عادي اقوله دور ربعك انت و هالعذر
3
ادق تلفون علىاي واحد من الربع والا الاخوان و الا السلف
4
بسيطه جدا
كل ما واحد يكلمني عن ان المسئول قاله
اقوله الله حتى انت قالك
و اديها ضحكه حقارة و استهزاء وامسك اللي يكلمني من ايده و اقول تكفى دق على 120 اخبار كونا الهاتفيه
و اهمس له اللحين كل اللي يختلف معاه يروح يدور و يقول و يزيد و يعيد
شنو المغزى من هالشي الا اذا ... و امشي
حسام ..
المشكلة انه هو من النوع اللي ماعنده احساس بهالموضوع ..
2-
بس إذا كان قريب مو شخص عادي .. هني صج مشكلة ..
3- والله هذا اللي سويته ..
4- وإذا كان اللي فوقه وايد واثق فيه !!
-----------------
مستعدة ..
هذي مشكلة .. ياتكتب اللي في بالي أو انت غلط :( ..
1- مافيها فايدة .. بتلعب ولا لا .. بس العرض ماكان فيه اي نوع من الاحترام ..
2- مثل ماقلت حق حسام .. شخص قريب وايد ..
3- لا احتفظ بالبجوة حق مكان ثاني احسن ..
4- يعجبني هالراي .. طول ماأني واثق من نفسي مالي شغل بغيري ..
مشكورين
شهد ..
وليش ماأجرحه وهو جارحني جذي ..!!
2- فرق بين اني اطوف واعصب زيادة .. اي وحده اختار !!
3- والله هذي الفكرة المنطقية .. بس كلش ماسويتها ..
4- إنزين اذا الموضوع صار له فوق السنة ونص !!
------------------
بولطيف ..
يعني بالعربي اسحب عليه :)
2- حتى لو كان من واحد قريب ..!!
3- مثل ماقلت حق شهد .. مافكرت اني اتصل باحد كلش ..
4- يعجبني وايد هالراي ..
مشكور طال عمرك ..
mate ..
1- يعني اكون مقدر الملعب مو الشخص ..!! :)
2- اللي يبرر بجذبه يلف ويدور ويغير الموضوع بسهولة ..
3- اذا كان الحجي باللي وماكو قواري برد ..!!
4- وليش اروح احسسه انه له قيمة ..!!
------------------
جبلة سيتي ..
يا حاضرين .. بس هذا تاريخ ميلاد مو رقم تلفون :)
2- راي سديد .. أوافقك عليه ..
3- لا عادي يلف وانت بكامل قواك العقلية والبدنية .. هذا شي مو بايدك .. :)
4- :)
-------------------
مشاري ..
1- يعني التقدير حق الجو مو حق الشخص ..
2- بس ماتحس ان في شي يبقى بالقلب ..!!
3- موقف وايد مليق ..
4- ونفس ردي على بوضرار :)
مشكورين
نار ..
مشكور على الخبر ..
-------------------
كويت ..
عيل انا مالي بالتعليق عليه بعد :)
2- راي طيب ..
3- لا يعني مو لدرجة الطبيب .. الانكل هو كاحل القدم .. فهمتي ..!!
4- مثل ماقلت حق حسام .. اذا كان اللي فوقه وايد واثق منه ..!!
5- والله ماأدري شنو فكرته بالضبط !!
مشكوره
------------------
بووليد ..
1- والله راي سديد وقوي .. شلون طافني ..:)
2- إنزين اذا كان قريب ..!!
3- ماينفع واحد من الوطنيين ..!! :)
4- هذا تقريبا اللي انا سويته .. :)
وهم مشكور :)
سلمك الله هذا مو تاريخ الميلااااااااد
هذا يعني اني جاهز 24 ساعة خلال اليوم في 7 أيام بالأسبوع
:)
عطني خبر وانا جاهز
تبي فريق تبيني انا بس تبي ناس تكمل اللي تبي موجووود
اشلون الحبيب ..
تراني اليوم حلمان ..
قاعد ألعب كرة في بيتكم ..
مع بو وليد أخوك .. :)
المهم .. بالنسبة حق الاسئلة ..
طال عمرك ..
لا تعب حالك ..
خل الأمور ايزي وانا أخوك ..
واذا أحد دق عليك تكملة عدد !
تعال العب .. وخل المنفعة لك ..
يعني راح تلعب ..
فكر بالإيجابية .. قبل السلبية ..
وأترك الاسئلة الباجية لنفس المحور .
وربي يحفظك.
إرسال تعليق