معرض الكتاب

رحت معرض الكتاب اكثر من مرة .. ومن أول يوم الناس كانت وايد مشحونة في موضوع المنع ، فكل ماتسلم على واحد يقولك ها كل الكتب اللي تبيها ممنوعة !! .
أو تشوف واحد يسأل عن كتاب فيقوله البايع موموجود يقوله ليش ، ممنوع بعد !!
بصراحة انا وايد ضاق خلقي من شكل المعرض وايد كتب اعتقد انها تسوى وتستحق القراءة موموجودة ..
تعمدت اسولف مع أكثر من بايع في دور النشر ، يقولي ياخي لو بإيدي مااشارك بمعرضكم ، صج ان انتوا الكتب تنباع عندكم وانتوا الكثر مبيعا في المنطقة .. بس المشكلة ان الرقابة ذابحتنا وموقادرين نييب الكتب اللي تسوى عندكم ..
واحد منهم قالي ان السنة اللي طافت يبت معاي 40 كرتون اسمحلوا ادخل بس 19 كرتون منهم ،
واحد منهم صدمني وقالي ان مستوى المنع عندكم صار اكثر من مستوى المنع في معرض الرياض ..

والحل .. إلى متى بنقعد جذي !! مشكورين اللي سووا الاعتصام واللافتة اللي معلقة على المكتبات ( إقرأ ماتشاء ) كان انتشارها حلو ، بس مااعتقد ان هذا الحل اللي راح يسمح بالكتب .. محتاجين جهات ثقافية قوية تضغط ضغط كبير عشان تشيل المنع ..

أنا من الناس اللي عندي قناعة ان المنع لازم يكون موجود بس بحدود ضيقة جدا .. يعني الكتاب اللي فيه سب للذات الالهية أو لأحد الصحابة أو للدين فهذا لايمكن ان يسمح له .. بس والله واحد قاعد يطرح راي قابل للنقاش ، فتعال ونرد على رايك براي ثاني .. والناس تتبع الحق ..

===================
وزارة الخارجية الفرنسية اعلنت ان 50 ألف مسلم فرنسي سيقومون بأداء فريضة الحج من فرنسا ، واعلنت الوزارة انها ستطبع 50 ألف نسخة من كتاب لشرح تعاليم الحج باللغة الفرنسية ، وانها ستسعى لتسهيل هذه الرحلة على مواطنيها .

ياجماعة هذي حكومة دولة غير مسلمة قررت انها توفر كل التسهيلات حق شعبها ، والله ياجماعة ناس راقية في التعامل .. مانقول غير الله يرحم الحال ..

===================
حكمة الاسبوع :
فالحقوق تاتي ليس بالمطالبة بل بالقيام بالواجب . خالص شلبي

===================
كتاب الاسبوع :

كتاب ضمن سلسلة حوارات لقرن جديد .. فكرة الحوارات ان تكون بين شخصين واحد مؤيد للموضوع وواحد معارض ، كل واحد فيهم يكتب بحث يبين فيه وجهة نظره .. بعدين الاول يعلق على بحث الثاني والثاني يعلق على بحث الاول ..
هذا الكتاب يتكلم عن الاقتصاد الاسلامي هل هو علم ام وهم .. كتاب طيب وأنصح بقراءته ..